ఫ్రెంచ్ మహిళపై అత్యాచార యత్నం
కాన్పూర్: ఉత్తరప్రదేశ్ రాష్ట్రంలోని కాన్పూర్ లోని ప్రభుత్వ ఆస్పత్రిలో ఒక ఫ్రెంచ్ మహిళపై వార్డ్ బాయ్ అత్యాచార యత్నానికి పాల్పడినట్లు పోలీసులు సోమవారం చెప్పారు. చికిత్స నిమిత్తం ఆస్పత్రికి వచ్చిన ఆ మహిళపై అతను అత్యాచార యత్నం చేసినట్లు వారంటున్నారు. వార్డ్ బాయ్ రన్వీర్ సింగ్ ను పోలీసులు అరెస్టు చేసి అతనిపై అత్యాచార యత్నం కేసు నమోదు చేశారు.
22 ఏళ్ల ఫ్రెంచ్ యువతి హీథర్ బేట్స్ తన బ్రిటిష్ మిత్రుడు జేమ్స్ హాకిన్స్ తో కలిసి రైల్లో పాట్నా వెళ్తుండగా ఆహారం తిన్నది. దాంతో ఆమె అస్వస్థతకు గురై ఆమె కాన్పూర్ లోని రైల్వే ఆస్పత్రిలో చేరింది. అక్కడి నుంచి ఆమెను శనివారం ప్రభుత్వ ఆధ్వర్యంలోని హాలెట్ ఆస్పత్రికి తరలించారు.ఐసియులో చేరిన బేట్స్ గత రాత్రి వార్డ్ బాయ్ తనపై అత్యాచార యత్నానికి ఒడిగట్టాడని ఆరోపించింది. దాంతో పోలీసులకు వైద్యులు సమాచారం అందించారు. అస్వస్థతకు గురైన వారిద్దరి పరిస్థితి మెరుగవుతోందని, త్వరలోనే డిశ్చార్జి చేస్తామని వైద్యులు చెప్పారు.