దిగొచ్చిన రోశయ్య: వ్యాఖ్యలు వెనక్కి

హైదరాబాద్: తెలుగుదేశం శాసనసభ్యుడు గాలి ముద్దుకృష్ణమ నాయుడిపై చేసిన వ్యాఖ్యలను ఆర్థిక మంత్రి కె.రోశయ్య ఉపసంహరించుకున్నారు. నువ్వు మగాడివా, సిగ్గూశరం ఉందా అని రోశయ్య చేసిన వ్యాఖ్యలపై తెలుగుదేశం శాసనసభ్యులు బుధవారం తీవ్రంగా ప్రతిస్పందించడంతో శాసనసభలో గందరగోళం చెలరేగిన విషయం తెలిసిందే. ఈ స్థితిలో రోశయ్య దిగివచ్చి-తాను గాలి ముద్దు కృష్ణమనాయుడిపై చేసిన వ్యాఖ్యలను ఉపసంహరించుకున్నట్లు గురువారం శాసనసభలో ప్రకటించారు. వ్యాఖ్యలను ఉపసంహరించుకున్నందుకు గాలి ముద్దు కృష్ణమనాయుడు రోశయ్యకు ధన్యవాదాలు తెలిపారు. స్పీకర్ కిరణ్ కుమార్ రెడ్డి కూడా దిగి వచ్చారు. తాను బుధవారం శాసనసభలో పరుషంగా మాట్లాడినందుకు తనను అర్థం చేసుకోవాలని కిరణ్ కుమార్ రెడ్డి అన్నారు. సభకు తాను కూడా కొత్తేనని ఆయన అన్నారు.

సభలో స్పీకర్ రూలింగ్ కు అందరూ కట్టుబడి ఉండాలని ముఖ్యమంత్రి డాక్టర్ వైయస్ రాజశేఖర రెడ్డి ఈ సందర్భంగా అన్నారు. తప్పును తప్పుగా ఒప్పుకుంటే సభ్యులకు గౌరవంగా ఉంటుందని ఆయన అన్నారు. సభను సజావుగా నిర్వహించుకోవడానికి సభ్యులందరూ సహకరించాలని ఆయన కోరారు. ప్రజాసమస్యలు లేవనెత్తడానికి తాము సిద్ధంగా ఉన్నామని, దానికి అధికార పక్షం సహకరించాలని ప్రతిపక్ష నాయకుడు నారా చంద్రబాబునాయుడు అన్నారు.