బాబుపై డిసిపి దురుసు ప్రవర్తన

హైదరాబాద్: ప్రతిపక్ష నాయకుడు నారా చంద్రబాబు నాయుడిపై డిసిపి హరికుమార్ సోమవారం శాసనసభ ఆవరణలో దురుసుగా ప్రవర్తించారు. మీడియా ప్రతినిధులతో మాట్లాడడానికి మీడియా పాయింట్ కు వచ్చిన చంద్రబాబును హరికుమార్ అడ్డుకున్నారు. మీడియా పాయింట్ వద్దనే కాదు, తెలుగుదేశం శాసనసభా పక్ష కార్యాలయంలోనూ మీడియాతో మాట్లాడడానికి వీలు లేదని హరికుమార్ చంద్రబాబుతో చెప్పారు. దీంతో చంద్రబాబు తీవ్ర ఆగ్రహం వ్యక్తం చేశారు. చంద్రబాబుతో తెలుగుదేశం శాసనసభ్యులు శ్రుతి కలిపారు.

శాసనసభలో పోలీసు రాజ్యం సాగుతోందని తెలుగుదేశం శాసనసభ్యుడు నాగం జనార్దన్ రెడ్డి ఆరోపించారు. మీడియాపై అడుగడుగునా అసెంబ్లీ ఆవరణలో ఆంక్షలు విధించారని ఆయన అన్నారు. మీడియాపై ఉన్న ఆంక్షలు ఎత్తేయాలని ఆయన స్పీకర్ కిరణ్ కుమార్ రెడ్డిని కోరారు. శాసనసభ ఆవరణలో స్వేచ్ఛ లేకుండా పోయిందని ఆయన అన్నారు.