అసెంబ్లీని తాకిన మిర్చి ఘాటు

హైదరాబాద్: గుంటూరు మిర్చి యార్డు ఘాటు శుక్రవారం శాసనసభను తాకింది. గుంటూరులోని మిర్చి యార్డు అగ్ని ప్రమాదం బాధితులకు నష్టపరిహారం చెల్లించే విషయమై శాసనసభ ప్రశ్నోత్తరాల సమయంలో తీవ్ర గందరగోళం చెలరేగింది. దీంతో స్పీకర్ సభను పది నిమిషాల పాటు వాయిదా వేశారు. రైతులను ఆదుకునే విషయంలో ప్రభుత్వం తన హామీని నిలబెట్టుకోలేకపోయిందని ప్రతిపక్షాలు విమర్శించారు.

బాధిత రైతులందరికీ నష్టపరిహారం అందేలా చర్యలు తీసుకుంటామని ముఖ్యమంత్రి డాక్టర్ వైయస్ రాజశేఖర రెడ్డి హామీ ఇచ్చారు. వారికి బీమా సొమ్ము అందేలా చూస్తామని ఆయన చెప్పారు. రైతులందరికీ నష్టపరిహారం చెల్లించలేదని తెలుగుదేశం సభ్యులు నిరసనకు దిగారు. దీంతో సభా కార్యక్రమాలు స్తంభించాయి.