పదవి వదలను: జస్వంత్

న్యూఢిల్లీ: తాను పబ్లిక్ అకౌంట్స్ కమిటీ (పిఎసి) చైర్మన్ పదవికి రాజీనామా చేయబోనని బిజెపి బహిష్కృత నేత జస్వంత్ సింగ్ చెప్పారు. పిఎసి చైర్మన్ పదవికి రాజీనామా చేయాలని బిజెపి నేత సుష్మా స్వరాజ్ తనను కలిసి కోరిన నేపథ్యంలో జస్వంత్ సింగ్ మంగళవారం ఆ విషయం చెప్పారు. పిఎసి పదవిని వదిలి పెడతారా అని మీడియా ప్రతినిధులు అడిగితే రాజీనామా చేయబోనని సమాధానమిచ్చారు.

పిఎసి పదవికి సంబంధించిన నిర్ణయం స్పీకర్ కే ఉంటుందని, అది రాజకీయ పార్టీ నిర్ణయంపై ఆధారపడి ఉంటుందని ఆయన చెప్పారు. తాను తిరిగి బిజెపిలో చేరే ప్రసక్తి లేదని, సమాజ్ వాదీ వంటి పార్టీలో కూడా చేరబోనని ఆయన చెప్పారు. తనకు బిజెపి తలుపులు మూసుకుపోయినట్లేనని ఆయన అన్నారు. సుప్రీంకోర్టు ఆవరణలో ఆయన మీడియా ప్రతినిధులతో మాట్లాడారు.