కుటుంబ వారసత్వం వద్దు: బాబు

హైదరాబాద్: తాను రాజకీయాల్లో తన కుటుంబ వారసత్వాన్ని ప్రోత్సహించబోనని తెలుగుదేశం పార్టీ అధ్యక్షుడు నారా చంద్రబాబు నాయుడు చెప్పారు. తెలంగాణ స్వాతంత్ర్య దినోత్సవం సందర్భంగా ఆయన గురువారం స్వాతంత్ర్య సమరయోధులను సన్మానించారు. పార్టీ కార్యాలయం ఎన్టీఆర్ ట్రస్టు భవన్ లో జాతీయ పతాకను ఆవిష్కరించారు. కొన్ని పార్టీలు కుటుంబ వారసత్వాన్ని రాజకీయాల్లో ప్రవేశపెడుతున్నాయనే మాట తనకు వినిపిస్తోందని, తాను మాత్రం అందుకు పూనుకోనని ఆయన అన్నారు. దివంగత నేత వైయస్ రాజశేఖర రెడ్డి కుమారుడు వైయస్ జగన్ ను ముఖ్యమంత్రిని చేయాలని డిమాండ్ వస్తున్న నేపథ్యంలో ఆయన వ్యాఖ్యలు ప్రాధాన్యం సంతరించుకున్నాయి.

ఆగస్టు 15వ తేదీ స్వాతంత్ర్య దినోత్సవానికి ఎంత ప్రాధాన్యం ఉందో, తెలంగాణ విమోచన జరిగిన సెప్టెంబర్ 17వ తేదీకి కూడా అంతే ప్రాధాన్యం ఉందని ఆయన అన్నారు. తాము అధికారంలోకి వస్తే తాము ఆ ప్రాధాన్యం ఇస్తామని ఆయన చెప్పారు. ఈ కార్యక్రమంలో తెలంగాణ సాయుధ పోరాట వీరుడు, తెలుగుదేశం పార్టీ నాయకుడు చెన్నమనేని రాజేశ్వర రావు కూడా ప్రసంగించారు.