మాంద్యం ప్రభావం తక్కువే: సిఎం

హైదరాబాద్: రాష్ట్ర ఆర్థిక పరిస్థితిపై ప్రపంచ ఆర్థిక మాంద్యం ప్రభావం తక్కువగానే ఉందని ముఖ్యమంత్రి కె. రోశయ్య అన్నారు. దివంగత ముఖ్యమంత్రి వైయస్ రాజశేఖర రెడ్డి అనుసరించిన ఆర్థిక విధానాలే కారణమని ముఖ్యమంత్రి ఆయన చెప్పారు. ఆర్థిక మాంద్యంపై హైదరాబాదులో జరిగిన అంతర్జాతీయ సదస్సులో ఆయన గురువారం ప్రసంగించారు. ఆర్థిక మాంద్యం ప్రభావం ఉన్నా రాష్ట్ర రెవెన్యూ 18 శాతం పెరిగిందని చెప్పారు. రాష్ట్రంలో గత ఐదేళ్లలో ప్రభుత్వం కొత్తగా పన్నులు వేయలేదని అన్నారు.

ప్రస్తుతం ప్రపంచం గడ్డు పరిస్థితిని ఎదుర్కుంటోందని రిజర్వ్ బ్యాంక్ మాజీ గవర్నర్, రాష్ట్ర మాజీ గవర్నర్ సి.రంగరాజన్ అన్నారు. పారిశ్రామికంగా అభివృద్ధి చెందిన దేశాలు కూడా ఆర్థిక మాంద్యంతో సతమతమవుతున్నాయని ఆయన అన్నారు. ఈ మాంద్యం ఎంత కాలం కొనసాగుతుందో కూడా చెప్పలేని స్థితి ఉందని ఆయన అన్నారు. క్రమంగా ఆర్థిక పరిస్థితి మెరుగవుతోందని, వచ్చే ఆర్థిక సంవత్సరంలో మరింత మెరుగయ్యే అవకాశం ఉందని చెప్పారు. వడ్డీ రేట్లు తగ్గే పరిస్థితి లేదని, వచ్చే ఏడాది వడ్డీ రేట్లు మరింత పెరుగుతాయని ఆయన అన్నారు.