వైయస్ జగనే సిఎం: రాయపాటి

హైదరాబాద్: ఈ నెలాఖరులోగా దివంగత ముఖ్యమంత్రి వైయస్ రాజశేఖర రెడ్డి తనయుడు వైయస్ జగన్మోహన్ రెడ్డి ముఖ్యమంత్రి అవుతారని కాంగ్రెసు పార్లమెంటు సభ్యుడు రాయపాటి సాంబశివరావు అన్నారు. తాను పార్టీ అధిష్ఠానవర్గానికి చెందిన సీనియర్ నాయకులను, ప్రధాని మన్మోహన్ సింగ్ ను కలిశానని, వారి హామీలను బట్టి జగనే ముఖ్యమంత్రి అవుతారని చెప్పగలనని ఆయన అన్నారు. ఆయన గురువారంనాడు కెవిపి రామచందర్ రావును కలిశారు. ఈ సందర్భంగా ఆయన మీడియా ప్రతినిధులతో మాట్లాడారు.

వైయస్ రాజశేఖర రెడ్డి మృతికి దిగ్భ్రాంతికి లోనై సంభవించిన మరణాలను సహజ మరణాలుగా జాతీయ మీడియా చిత్రీకరించడం సరి కాదని ఆయన అన్నారు. వైయస్ రాజశేఖర రెడ్డి అభిమానుల ఆత్మహత్యలను సహజ మరణాలుగా జాతీయ మీడియా చిత్రీకరించడం మంచి పద్ధతి కాదని రాష్ట్ర పంచాయతీరాజ్ శాఖ మంత్రి బొత్సా సత్యనారాయణ కూడా అన్నారు. మీడియా ఏమి రాసినా వైయస్ మరణంతో రాష్ట్ర ప్రజల గుండెలు పగిలాయనేది వాస్తవమని ఆయన విడిగా మీడియా ప్రతినిధులతో అన్నారు.