బానిసగా పని చేయలేను: జస్వంత్

హైదరాబాద్: తాను తిరిగి బిజెపిలో చేరే ప్రసక్తే లేదని, బానిసగా పని చేయలేనని బిజెపి బహిష్కృత నేత జస్వంత్ సింగ్ అన్నారు. తనపై బహిష్కరణను ఎత్తేసినా బిజెపిలో చేరబోనని ఆయన స్పష్టం చేశారు. హైదరాబాదులోని ప్రెస్ క్లబ్ లో ఏర్పాటు చేసిన మీట్ ది ప్రెస్ కార్యక్రమంలో ఆయన శనివారం మాట్లాడారు. రాజకీయాలు అంటేనే విసుగు పుట్టిందని, ఏ పార్టీలోనూ చేరబోనని ఆయన అన్నారు. కాంగ్రెసుతో పాటు అన్ని పార్టీలు ప్రైవేటే లిమిటెడ్ కంపెనీల్లా మారిపోయానని, తాను బానిసగా పనిచేయలేనని ఆయన అన్నారు.

పాకిస్తాన్ దేశ వ్యవస్థాపకుడు మహ్మద్ జిన్నాపై తాను చేసిన వ్యాఖ్యలను ఆయన సమర్థించుకున్నారు. హిందూ - ముస్లింల మధ్య చోటు చేసుకున్న విభేదాలను తొలగించడమే తన ఉద్దేశమని ఆయన చెప్పారు. గుజరాత్ అల్లర్లకు బిజెపిదే బాధ్యత అని ఆయన అభిప్రాయపడ్డారు. ముఖ్యమంత్రిని మార్చాలని తాను కోరినా పార్టీ అధిష్ఠానం పట్టించుకోలేదని ఆయన విమర్శించారు. నక్సల్ప్ సమస్యను శాంతిభద్రతల అంశంగా చూడవద్దని ఆయన అభిప్రాయపడ్డారు.