జమ్మూలో ముగ్గురు మిలిటెంట్ల కాల్చివేత

జమ్ము: జమ్మూ కాశ్మీర్ లోని రియాసీ జిల్లా మహోర్ ప్రాంతంలో భారత భద్రతా బలగాలు బుధవారం ముగ్గురు మిలిటెంట్లను కాల్చి చంపాయి. తమకు అందిన సమాచారం మేరకు రాష్ట్రీయ రైఫిల్స్ బలగాలు, పోలీసులు బలగాలు జమ్మూకు 200 కిలోమీటర్ల దూరంలో గల మహోర్ ప్రాంతంలో సంయుక్తంగా ఆపరేషన్ ప్రారంభించాయి. ఈ సందర్భంగా జరిగిన ఎన్ కౌంటర్ లో ముగ్గురు మిలిటెంట్లు మరణించినట్లు రక్షణ శాఖ అధికార ప్రతినిధి చెప్పారు.

సంఘటనా స్థలం నుంచి భారత బలగాలు రెండు ఎకె 47 రైఫిళ్లను, ఒక పిస్టల్ ను, నాలుగు హ్యాండ్ గ్రెనేడ్లను స్వాధీనం చేసుకున్నాయి. మిలిటెంట్లను ఇంకా గుర్తించాల్సి ఉందని అధికార ప్రతినిధి చెప్పారు. ఆ ప్రాంతంలో భారత బలగాలు ఇంకా గాలింపు చర్యలు సాగిస్తున్నాయి.