వైయస్ జగన్ కు చెక్ పెట్టేందుకే...

హైదరాబాద్: కడప పార్లమెంటుసభ్యుడు వైయస్ జగన్ కు చెక్ పెట్టేందుకు, దీర్ష ప్రయోజనాలు ఆశించి కాంగ్రెసు పార్టీ ప్రజారాజ్యం పార్టీతో గ్రేటర్ హైదరాబాద్ ఎన్నికల్లో పొత్తుకు సిద్ధపడినట్లు భావించవచ్చు. కాంగ్రెసుకు ప్రజాకర్షణ ఉన్ననాయకుడు అవసరమని, అది కేవలం జగన్ కు మాత్రమే ఉందని ఆయన వర్గం వాదిస్తున్న నేపథ్యంలో కాంగ్రెసు పార్టీ ప్రజారాజ్యం పార్టీతో పొత్తుకు సిద్ధపడింది. ప్రజారాజ్యం పార్టీ అధినేత చిరంజీవికి ప్రజాకర్షణ ఉన్నప్పటికీ దాన్ని ఓట్లుగా మలుచుకోవడంలో విఫలమవుతున్నారనే వాదన ఉంది. ఈ రెండింటిని సమన్వయం చేసి తెలుగుదేశం పార్టీని ఓడించడమే కాకుండా జగన్ ను తలెత్తకుండా చేయడం ఈ పొత్తులో ఆంతర్యంగా భావించవచ్చు. రెండు రోజుల్లో రెండు పార్టీల మధ్య సీట్ల పంపకం తుది రూపం తీసుకుంటుందని పిసిసి అధ్యక్షుడు డి.శ్రీనివాస్ చెప్పారు.

కాంగ్రెసుతో పొత్తు చిరంజీవికి తన నేతలను కాపాడుకోవడానికి పనికి వస్తుందని భావిస్తున్నారు. పార్టీ భవిష్యత్తు లేదనే అభిప్రాయం బలంగా ఉన్న నేపథ్యంలో పొత్తు వల్ల వారికి ఆత్మస్థయిర్యం కలిగించడానికి ఇది పనికి వస్తుందని అంటున్నారు. గత రెండు రోజులుగా చిరంజీవి పార్టీ నాయకులతో విస్తృతంగా చర్చించి పొత్తుపై నిర్ణయం తీసుకున్నారు. గ్రేటర్ హైదరాబాద్ ఎన్నికలకే ఈ పొత్తు పరిమితం కాదని, భవిష్యత్తులో కూడా ఇది కొనసాగుతుందని అంటున్నారు. దూరదృష్టితో కాంగ్రెసు పార్టీ ప్రజారాజ్యం పార్టీని కలుపుకుని పోవాలని భావిస్తోంది. 2104 ఎన్నికల్లో చిరంజీవి ఇమేజ్ ద్వారా, తన సంస్థాగత నిర్మాణం ద్వారా విజయం సాధించడానికి ఈ పొత్తు పునాదిగా భావిస్తున్నారు.

ఇరు పార్టీలకు ఈ పొత్తు అవసరంగా మారిందని చెప్పవచ్చు. రాజకీయంగా మనుగడ సాగించడానికి చిరంజీవికి, భవిష్యత్తు విజయానికి కాంగ్రెసుకు ఈ పొత్తు అవసరంగా మారిందని అంటున్నారు. చిరంజీవిని కలుపుకుని పోవడానికే కాంగ్రెసు పార్టీ మజ్లీస్ తో పొత్తుకు నిరాకరించినట్లు భావిస్తున్నారు.