ముంబై లోకల్ రైల్లో ప్రయాణించిన రాహుల్

ముంబై: శివసేన హెచ్చరికలను, ఆందోళనలను బేఖాతరు చేస్తూ పటిష్టమైన భద్రతా ఏర్పాట్ల మధ్య కాంగ్రెసు ప్రధాన కార్యదర్శి రాహుల్ గాంధీ ముంబైలో అడుగు పెట్టారు. రాహుల్ గాంధీ పర్యటనను వ్యతిరేకిస్తూ శివసైనికులు నల్ల జెండాలతో నిరసన తెలిపే ప్రయత్నం చేశారు. భద్రతా ఏర్పాట్లతో ముంబై నగరంలో దాదాపు కర్ఫ్యూ వాతావరణం నెలకొంది. రాహుల్ గాంధీ విలే పార్లే నుంచి ఘట్కో పోరుకు హెలికాప్టర్ లో వెళ్లడానికి బదులు స్థానిక రైల్లోచ ప్రయాణించారు.

అంతకు ముందు రాహుల్ గాంధీ శుక్రవారం ఉదయం 11 గంటల 20 నిమిషాల ప్రాంతంలో శాంతాక్రుజ్ విమానాశ్రయంలో దిగారు. ఆ తర్వాత విద్యార్థులతో ముచ్చటించడానికి భైదాస్ హాల్ కు వెళ్లారు. అక్కడికి కొద్ది కిలోమీటర్ల దూరంలో శివసైనికులు నిరసన తెలియజేస్తూ ప్రదర్శన నిర్వహించారు. శివసేన కార్పొరేటర్ రాజుల్ పటేల్ బారికేడ్లను ఛేదించుకుని ముందుకు పోవడానికి ప్రయత్నించారు. ఆయనను పోలీసులు అదుపులోకి తీసుకున్నారు. ఆంధేరి, విలే పార్లే, జోగేశ్వరి, ఘట్కోపర్ ల్లో శివసైనికులు గుంపులుగా చేరుకున్నారు.