తెలంగాణ రాష్ట్రం ఏర్పడుతుంది: విహెచ్

హైదరాబాద్: కచ్చితంగా తెలంగాణ రాష్ట్రం ఏర్పడుతుందని కాంగ్రెసు తెలంగాణ సీనియర్ నేత వి. హనుమంతరావు అన్నారు. ప్రత్యేక తెలంగాణ రాష్ట్ర ఏర్పాటుకే కేంద్ర ప్రభుత్వం శ్రీకృష్ణ కమిటీని ఏర్పాటు చేసిందని ఆయన శుక్రవారం మీడియా ప్రతినిధులతో అన్నారు. తమ పార్టీ తెలంగాణకు అనుకూలంగా ఉందని ఆయన చెప్పారు. సమైక్యాంధ్ర అనేది కొత్త నినాదమని ఆయన అభిప్రాయపడ్డారు. సీమాంధ్ర ప్రజలు కూడా రాష్ట్ర విభజనను కోరుకుంటున్నట్లు ఆయన తెలిపారు.

ప్రజాప్రతినిధులు రాజీనామాలు చేయడం మంచిది కాదని, రాజీనామాలు చేస్తే రాష్ట్రంలో రాజకీయ సంక్షోభం తలెత్తుతుందని ఆయన అన్నారు. రాష్ట్రపతి పాలన వస్తే ప్రత్యేక రాష్ట్రం ఏర్పాటు సాధ్యం కాదని ఆయన అన్నారు. శ్రీకృష్ణ కమిటీ తెలంగాణ ఏర్పాటుకే పని చేస్తుందని ఆయన అన్నారు. మధ్యలో ఏమైనా జరగవచ్చుననే ఆవేదన తెలంగాణ ప్రజల్లో ఉండడం సహజమని ఆయన అన్నారు. కేంద్ర ప్రభుత్వం ఇంతకు ముందు చేసిన ప్రకటనలకు అనుగుణంగా తెలంగాణ రాష్ట్రం ఏర్పాటుకు శ్రీకృష్ణ కమిటీ రోడ్ మ్యాప్ అనుకుంటున్నామని ఆయన అన్నారు.