వచ్చే వారం ఉయ్యూరు ఆర్టీసీ డిపోకు ప్రాణం

విజయవాడ: మూతపడిన ఉయ్యూరు ఆర్టీసీ డిపోను వారం రోజుల్లోగా ప్రారంభించాలని నిర్ణయించారు. డిపో ప్రారంభ కార్యక్రమానికి ఆర్టీసీ ఎండీ ప్రసాదరావును ఆహ్వానించాలని నిర్ణయించినట్లు తెలిసింది. అదే సమయంలో గవర్నర్‌పేట సీఎన్‌జీ డిపోను కూడా ప్రారంభించడానికి సన్నద్ధం చేస్తున్నారు. ఎగ్జిక్యూటివ్‌ డైరెక్టర్‌ (ఆపరేషన్స్‌) కూడా ఈ నెల 23 న నగరానికి రానున్నట్లు సమాచారం.

2006 తర్వాత జిల్లాలో గన్నవరం, ఉయ్యూరు డిపోలను నష్టాల బాటలో ఉన్నందున మూసివేశారు. డిపోను మూసివేసేనాటికి ఆ ఏడాది ఉత్తమ డిపోగా అవార్డును అందుకుంది. 47 ఆర్టీసీ, 26 అద్దె బస్సులు 336 ట్రిప్పులు నడిపేవారు. ఈ డిపో ఆపరేటింగ్‌ రేషియో 63 నుంచి 70 శాతం ఉండేది. గత ఎన్నికల ముందే వైఎస్‌ ఈ డిపోలను పునఃప్రారంభించాలని ఆదేశించారు. ఇందులో భాగంగా మొదట ఉయ్యూరు డిపోను ప్రారంభించనున్నారు. ఒక్కోడిపో నుంచి 60 నుంచి 70 సర్వీసులను ప్రారంభించేందుకు సన్నాహాలు చేస్తున్నారు. ఎన్యూఆర్‌ఎం బస్సులు పెద్ద సంఖ్యలో నగరానికి రానుండటంతో వాటిని ఉపయోగించుకునేలా డిపోను ప్రారంభించనున్నారు.