చంద్రబాబు క్షమాపణ చెప్పాలి: ఒయు జెఎసి

హైదరాబాద్: ప్రతిపక్షాల మహాధర్నా సందర్భంగా హైదరాబాదులోని ఇందిరాపార్కు వద్ద తెలంగాణ న్యాయవాదులపై తెలుగుదేశం కార్యకర్తలు దాడి చేయడంపై సర్వత్రా నిరసన వ్యక్తమవుతోంది. చంద్రబాబు స్పష్టమైన వైఖరి చెప్పాలని డిమాండ్ చేస్తున్న తెలంగాణ న్యాయవాదులపై తెలుగుదేశం పార్టీ కార్యకర్తలు శనివారం దాడి చేశారు. ఈ దాడులు న్యాయవాదులు పలువురు గాయపడ్డారు. ఈ దాడిపై తెలంగాణ నేతల నుంచి, సంఘాల నుంచి తీవ్ర నిరసన వ్యక్తమవుతోంది. చంద్రబాబు బేషరతు క్షమాపణ చెప్పాలని ఉస్మానియా విశ్వవిద్యాలయం ఐక్య కార్యాచరణ కమిటీ (జెఎసి) డిమాండ్ చేసింది. ఈ దాడికి చంద్రబాబు బాధ్యత వహించాలని ఒయు జెఎసి నాయకులన్నారు. తెలుగుదేశం పార్టీ నాయకులను తిరగనివ్వబోమని, తెలుగుదేశం పార్టీ కార్యాలయాలపై దాడులు చేస్తామని వారు హెచ్చరించారు. జరగబోయే పరిణామాలకు చంద్రబాబు బాధ్యత వహించాల్సి ఉంటుందని వారన్నారు. న్యాయవాదులపై దాడికి నిరసనగా ఎక్కడికక్కడ ఆందోళన చేపడతామని వారన్నారు.

చంద్రబాబే తెలంగాణ న్యాయవాదులపై కార్యకర్తలను దాడికి ఉసిగొల్పారని తెలంగాణ రాష్ట్ర సమితి (తెరాస) నాయకుడు హరీష్ రావు విమర్శించారు. ప్రజాస్వామ్యబద్దంగా తెలంగాణపై వైఖరి చెప్పాలని చంద్రబాబును అడినందుకు తెలుగుదేశం పార్టీ కార్యకర్తులు, గుండాలు దాడి చేశారని ఆయన అన్నారు. చంద్రబాబు తమ పార్టీ కార్యకర్తలను ఆపడానికి కూడా ప్రయత్నించలేదని ఆయన అన్నారు. న్యాయవాదులపై దాడిని తెలంగాణ జెఎసి ఖండించింది. ప్రజాస్వామ్యంలో నిరసన తెలిపే అధికారం ప్రతి ఒక్కరికీ ఉందని జెఎసి అన్నది. జరిగిన సంఘటన మంచిది కాదని, జరగాల్సి ఉండింది కాదని తెలంగాణకు చెందిన తెలుగుదేశం నాయకుడు కడియం శ్రీహరి అన్నారు. న్యాయవాదులకు ఆయన క్షమాపణ చెప్పారు.

ధరల పెంపునకు నిరసనగా తెలుగుదేశం, సిపిఐ, సిపిఎం ఇందిరా పార్కు వద్ద మహా ధర్నా చేపట్టాయి. ఈ సందర్భంగా చంద్రబాబు ప్రసంగాన్ని అడ్డుకునేందుకు తెలంగాణ న్యాయవాదులు ప్రయత్నించారు. తెలంగాణపై స్పష్టమైన వైఖరి వెల్లడించాలని డిమాండ్ చేశారు. ఈ సమయంలో తెలుగుదేశం పార్టీ కార్యకర్తులు వారిపై దాడి చేశారు. సీమాంధ్రకు చెందిన తెలుగుదేశం పార్టీ కార్యకర్తలు న్యాయవాదులపై దాడి చేశారని తెరాస నాయకుడు కెటి రామారావు అన్నారు.