ఎమ్మెల్యేలను తిరగనివ్వం: సమైక్యాంధ్ర జెఎసి

గుంటూరు: ఫ్రీ జోన్‌ పై సుప్రీంకోర్టు తీర్పుకు వ్యతిరేకంగా అసెంబ్లీలో తీర్మానిస్తే ఎమ్మెల్యేలను సీమాంధ్రలో తిరగనివ్వమని సమైక్యాంధ్ర జెఎసి హెచ్చరించింది. సుప్రీం కోర్టు ఇచ్చిన తీర్పుకు భిన్నంగా అసెంబ్లీలో తీర్మానం చేయాలని నిర్ణయించడాన్ని తప్పుపట్టింది. ఫ్రీ జోన్ వ్యవహారంపై సుప్రీం కోర్టు ఇచ్చిన తీర్పుకు ప్రతి ఒక్కరు బద్దులై ఉండాలని, తీర్పును శిరసావహించాలని సమైక్యాంధ్ర జెఎసి కన్వీనర్ శామ్యూల్ హెచ్చరించారు.

పోలీసుల ఎంపికలో ఒక ప్రాంతం వారికే అవకాశం కల్పిస్తే హైదరాబాద్‌లో ఉండే సీమాంధ్రులకు రక్షణ కరవవుతుందని ఆందోళన వ్యక్తంచేశారు. ఒకే ప్రాంతం వారికి ఉద్యోగాల్లో అవకాశం కల్పించడమనేది తప్పుడు సంకేతాలు పంపుతుందన్నారు. ఎన్నికైన ప్రజా ప్రతినిధులు దానిని ఆమోదిస్తే సీమాంధ్రకు అన్యాయం చేసినవారవుతారన్నారు. అసెంబ్లీలో ఫ్రీ జోన్‌కు వ్యతిరేకంగా ఎమ్మెల్యేలు ఓటువేస్తే ప్రజలు ఊరుకోరని, వారి ఆగ్రహానికి గురి కాకతప్పదని హెచ్చరించారు.