నిత్యానంద స్వామిపై డ్రైవర్ తాజా కేసు

బెంగళూరు: రాసలీలల నిత్యానంద స్వామిపై ఆయన కారు డ్రైవరు లెనిన్‌ అలియాస్‌ నిత్య ధర్మానంద బెంగళూరు సమీపంలోని బిడది పోలీసు స్టేషన్‌లో కేసు పెట్టారు. పోలీసు భద్రత నడుమ ఆయన స్టేషన్‌కు వెళ్లి నిత్యానందపై ఫిర్యాదు చేశారు. సెక్షన్‌ 295, 376, 506, 120 బి కింద నిత్యానందపై కేసులు నమోదు చేసుకున్నామని పోలీసులు తెలిపారు. లైంగిక వేధింపులు, భక్తి ముసుగులో రాసలీలలతో అందరినీ పక్కదారి పట్టిస్తోన్న నిత్యానంద రాసలీలలను తానే చిత్రీకరించానని లెనిన్‌ ప్రకటించుకున్నారు. నిత్యానంద, ఇతర ఆశ్రమవాసుల నుంచి ప్రాణహాని ఉందంటూ లెనిన్‌ తరుపు ప్రతినిధి, కోయంబత్తూరుకు చెందిన విశ్వనాథ్‌ అనే వ్యక్తి చెన్నై పోలీసులకు ఫిర్యాదు చేశాడు.

ప్రస్తుతం కేసు విచారణ మొత్తం కర్ణాటక పోలీసులకు అప్పగించారు. దీన్ని దృష్టిలో ఉంచుకుని లెనిన్‌ను బిడది పోలీసు స్టేషన్‌ లో ఫిర్యాదు చేయమని పోలీసులు, కోర్టు సూచించింది. లెనిన్‌ ఎక్కడ తలదాచుకున్నదీ రహస్యంగా ఉంచారు. నిత్యానంద ఆశ్రమానికి ఇప్పటికే సమన్స్‌ పంపామని పోలీసు అధికారులు స్పష్టీకరించారు. బిడదిలోని ధ్యానపీఠం ముఖ్య కార్యాలయం ఉన్న భూమిలో ఎక్కువ భాగం దానాల రూపంలో వచ్చిందని, కొన్నింటి పత్రాలు సరిగా లేవని రెవెన్యూ, జిల్లాధికారి నేతృత్వంలోని అధికారులు ప్రాథమిక దర్యాప్తులో గుర్తించారు.