ప్రతి ఒక్కరికీ ఆ కోరిక ఉంటుంది: శంకర్రావు

హైదరాబాద్: మంత్రి పదవి కావాలని తనతో సహా ప్రతి ఒక్కరికీ కోరిక ఉంటుందని కాంగ్రెసు కంటోన్మెంట్ శాసనసభ్యుడు పి. శంకర రావు అన్నారు. కొత్త శాసనసభ్యులు మంత్రి పదవులు కోరడాన్ని తాను తప్పు పట్టబోనని ఆయన గురువారం మీడియా ప్రతినిధుల సమావేశంలో అన్నారు. ఎవరికి ఏ పదవి ఇవ్వాలన్నది ముఖ్యమంత్రి, పార్టీ అధిష్టానం నాయకులు నిర్ణయిస్తారని ఆయన అన్నారు. సీనియర్ శాసనసభ్యుడైన శంకరరావు మంత్రి పదవి ఆశిస్తున్నారు.

కాగా, మంత్రివర్గంలో తమకు స్థానం కల్పించాలని కోరుతూ శాసనసభకు మొదటి సారి ఎన్నికైన కాంగ్రెసు సభ్యులు ముఖ్యమంత్రి కె. రోశయ్యను కోరారు. ఈ మేరకు 45 మంది సంతకాలతో కూడిన ఓ వినతి పత్రాన్ని వారు ముఖ్యమంత్రికి సమర్పించారు. నామినేటెడ్ పదవుల్లోనూ, కాంగ్రెసు లెజిస్లేచర్ పార్టీ కార్యవర్గంలోనూ తమకు స్థానం కల్పించాలని వారు కోరారు.