శాసనసభకు టిడిపి ఎమ్మెల్యేల పాదయాత్ర

హైదరాబాద్: సభలో ప్రజాసమస్యలు చర్చించాలని డిమాండ్ చేస్తూ తెలుగుదేశం శాసనసభ్యులు గురువారం శాసనసభ వరకు పాదయాత్ర నిర్వహించారు. అంతకు ముందు వారు శాసనసభ ఎదురుగా ఉన్న గన్ పార్కు వద్ద నిరసన ప్రదర్శన చేపట్టారు. శాసనసభ సమావేశాలు ఉదయం, సాయంత్రం నిర్వహించాలని వారు డిమాండ్ చేశారు. డిప్యూటీ స్పీకర్ నాదెండ్ల మనోహర్ వ్యవహార శైలిని తెలుగుదేశం శాసనసభ్యులు నిరసించారు.

ప్రజా సమస్యలు చర్చకు రాకుండా డిప్యూటీ స్పీకర్ చవకబారు ఎత్తుగడలకు పాల్పడుతున్నారని వారు విమర్శించారు. తమను అవమానకరంగా చూస్తున్నారని వారు అభిప్రాయపడ్డారు. సరైన కారణం లేకుండా సభను అర్థాంతరంగా వాయిదా వేస్తూ నెపాన్ని తమపైకి నెడుతున్నారని వారు ఆరోపించారు. ఈ విధమైన వైఖరిని ప్రజలు సహించబోరని వారు హెచ్చరించారు. నాదెండ్ల మనోహర్ తన తీరు మార్చుకుని ప్రజా సమస్యల పరిష్కారానికి కృషి చేయాలని వారు సూచించారు.