అమితాబ్ నేరమేమీ చేయలేదు: థాకరే

ముంబై: సీలింక్ వివాదంలో శివసేన చీఫ్ బాల్ థాకరే బాలీవుడ్ నటుడు అమితాబ్ బచ్చన్ కు మద్దతుగా నిలిచారు. బంద్రా - వర్లీ రెండో సీలింక్ ప్రారంభోత్సవ కార్యక్రమానికి హాజరు కావడం ద్వారా అమితాబ్ తప్పేమీ చేయలేదని ఆయన శనివారం అన్నారు. ఆ కార్యక్రమానికి అమితాబ్ హాజరు కావడం నేరమేమీ కాదని ఆయన అన్నారు. ఈ మేరకు ఆయన తమ అధికారిక పత్రిక సామ్నాలో సంపాదకీయం రాశారు. అమితాబ్ ను కాంగ్రెసు పార్టీ అంటరానివాడిగా చూడడంపై ఆయన తీవ్రంగా ధ్వజమెత్తారు.

షారూఖ్ ఖాన్ పాకిస్తాన్ వకాల్తా పుచ్చుకుంటే కాంగ్రెసుకు నచ్చిందని, అమితాబ్ మాత్రం నచ్చలేదని ఆయన అన్నారు. అమితాబ్ హాజరు కావడం వల్ల సీలింక్ ప్రారంభోత్సవ కార్యక్రమం ప్రతిష్ట పెరిగిందని ఆయన అన్నారు. అమితాబ్ దొంగ, బందిపోటు, ఉగ్రవాది కాడని ఆయన అన్నారు. గుజరాత్ బ్రాండ్ అంబాసిడర్ గా వ్యవహరిస్తున్నందుకు అమితాబ్ ను కాంగ్రెసు లక్ష్యంగా చేసుకుందని, ముంబైలో నివసిస్తున్న అంబానీ, టాటా గుజరాత్ లో పెట్టుబడులు పెట్టారని, నరేంద్ర మోడీ గుజరాత్ లో ఎందుకు పెట్టుబడులు పెడుతున్నారని వారిని అడిగే దమ్ము కాంగ్రెసుకు ఉందా అని ఆయన అన్నారు. అమితాబ్ దేశానికి చెందినవాడని, అలాగే ఉంటాడని ఆయన అన్నారు.