ఇంజినీరింగ్ విద్యార్ధి దారుణ హత్య

నరసరావుపేట: చిన్న వివాదం ఇంజినీరింగ్ విద్యార్ధి ప్రాణాలను బలిగొంది. నరసరావుపేట మండలంలోని ఈశ్వర్‌ ఇంజినీరింగ్‌ కళాశాల విద్యార్థి గంటా చెన్నారెడ్డి (24) దారుణ హత్యకు గురయ్యాడు. కళాశాలలో కూర్చునే కుర్చీ విషయంలో తలెత్తిన వివాదం కారణంగా గురువారం సహ విద్యార్థులే అతడిని హత్య చేసినట్లు తెలిసింది. ప్రకాశం జిల్లా కనిగిరి సమీపంలోని హనుమంతునిపాడు గ్రామానికి చెందిన చెన్నారెడ్డి నరసరావుపేట మండలం కేసానుపల్లిలోని ఈశ్వర్‌ ఇంజినీరింగ్‌ కళాశాలలో సీఎస్‌ఈ ద్వితీయ సంవత్సరం చదువుతున్నాడు. పట్టణంలోని ప్రకాష్‌ నగర్‌ 60 అడుగుల రోడ్డులో ఉన్న ఓ గదిలో అద్దెకు ఉంటున్నాడు. కళాశాల నుంచి గురువారం సాయంత్రం చెన్నారెడ్డి తన గదికి వచ్చాడు.

ఐదు గంటల తరువాత తోటి విద్యార్థులు హర్షవర్ధన్‌ రెడ్డి, నాగాంజనేయులు వచ్చి అతడిని ద్విచక్ర వాహనంపై ఎక్కించుకెళ్ళారు. గంట తరువాత చెన్నారెడ్డిని స్థానిక అరండల్‌ పేటలోని నిల్‌ హాస్పటల్‌ వద్దకు తీసుకొచ్చారు. రోడ్డు ప్రమాదం జరిగిందని ఆస్పత్రి సిబ్బందికి చెప్పారు. అక్కడున్న కాంపౌండర్‌ హనిమిరెడ్డి పరీక్షించి చెన్నారెడ్డి చనిపోయాడని చెప్పారు. ఆ ఇద్దరు యువకులు, వారితో పాటు వచ్చిన మరికొందరు..బంధువులకు చెబుతామంటూ వెళ్లిపోయారు. ఈ సమాచారం ఆ తరువాత స్థానికంగా ఉన్న చెన్నారెడ్డి బంధువులకు తెలిసింది. చెన్నారెడ్డి శరీరంపై తీవ్ర గాయాలున్నాయి.

ముఖం మీద, కాళ్ళపైన, మర్మా వయవాలపై గాయాలై రక్తం కారినట్లు కనిపిస్తోంది. క్రికెట్‌ బ్యాట్‌లతో కొట్టి హత్యచేసి ఉంటారని పోలీసులు, బంధువులు అనుమానిస్తున్నారు. పట్టణ సీఐ దిలీప్‌ కుమార్‌, ఎస్‌ ఐ సాంబశివరావు, రూరల్‌ ఎస్‌ ఐ సుబ్బారావు ఆస్పత్రిలో చెన్నారెడ్డి మృతదేహాన్ని పరిశీలించారు. కళాశాల విద్యార్థి వెంకటేశ్వర్లును విచారించి వివరాలు సేకరించారు. ఆ సమాచారం మేరకు..విద్యార్థులు నాగాంజనేయులు, హర్షవర్థన్‌రెడ్డిలకు చెన్నారెడ్డికి బుధవారం కళాశాలలో కూర్చునే కుర్చీల వద్ద వాదన జరిగింది. అంతకుముందు ఓ యువతి విషయంలో కూడా వారిమధ్య విభేదాలున్నాయని తెలిసింది. ఈ హత్యకు సంబంధించి ఆరుగురు విద్యార్థులపై పోలీసులు కేసు నమోదు చేశారు.