కచ్చితంగా నా కొడుకు వస్తాడు: బాలయ్య

విజయవాడ: సమయం వచ్చినప్పుడు తన కుమారుడు మోక్షజ్ఞ కచ్చితంగా సినిమాల్లోకి వస్తాడని ప్రముఖ సినీ నటుడు బాలకృష్ణ చెప్పారు. తన కుమారుడికి ఇంకా పదిహేనేళ్లేనని, సమయం వచ్చినప్పుడు తప్పకుండా సినిమాల్లోకి వస్తాడని ఆయన అన్నారు. సింహ సినిమా యూనిట్ తో కలిసి ఆయన గురువారం అంతర్వేదిని సందర్శించుకున్నారు. ఈ సందర్భంగా మీడియా ప్రతినిధులతో ఆయన మాట్లాడారు. మోక్షజ్ఞ సినీ రంగ ప్రవేశం చేస్తాడని వస్తున్న వార్తలపై ఆయన ప్రతిస్పందించారు.

సింహా సినిమా యూనిట్ సభ్యులతో కలిసి ఆయన విజయవాడలోని ఇంద్ర కీలాద్రిపై కొలువైన అమ్మవారిని దర్శించుకున్నారు. కనకదుర్గకు ప్రత్యేక పూజలు చేశారు. అధికారులు ఆయనకు స్వాగతం పలికి దర్శనం చేయించారు. అనంతరం అమ్మవారి చిత్ర పటం, ప్రసాదాలు అందించారు. సింహా యూనిట్ సభ్యులతో కలిసి ఆయన రాష్ట్రవ్యాప్తంగా దేవాలయాలను సందర్శిస్తున్న విషయం తెలిసిందే.