చంద్రబాబును తెలంగాణ నుంచి తరిమికొడ్తాం: కెసిఆర్

నల్గొండ: తెలంగాణ నుంచి చంద్రబాబును, తెలుగుదేశం పార్టీని తరిమి కొడ్తామని తెలంగాణ రాష్ట్ర సమితి అధ్యక్షుడు కె. చంద్రశేఖర రావు అన్నారు. తెలంగాణ ప్రత్యేక రాష్ట్రం ఏర్పాటుపై చంద్రబాబు అహంకారపూరిత వ్యాఖ్యలతో టిడిపి ఆంధ్రా పార్టీ అని తేటతెల్లమైందని ఆయన అన్నారు. చంద్రబాబు భరతం పడతామని, వంద చంద్రబాబులు, ఆయన జేజమ్మలు అడ్డొచ్చినా తెలంగాణ సాధించుకు తీరుతామని చంద్రశేఖర్‌రావు ఆగ్రహం వ్యక్తంచేశారు. తమ వ్యతిరేకుల్ని తెలంగాణ రథచక్రాల కింద నలిపేస్తామని, ఇక్కడి తెదేపా ప్రతినిధులు రాజీనామా చేసి వస్తే తిరిగి గెలిపిస్తామన్నారు. ప్రత్యేక రాష్ట్ర వ్యతిరేక వ్యాఖ్యలు చేసిన బాబుతో క్షమాపణ చెప్పించాలని డిమాండు చేశారు. నల్గొండ జిల్లా నుంచి పలువురు తెరాసలో చేరిన సందర్భంగా ఆయన పలు ప్రాంతాల్లో ప్రసంగించారు.

నిరుడు డిసెంబరు 9కు ముందు శాసనసభలో మీరేం మాట్లాడారని ఆయన మిర్యాలగుడా సభలో చంద్రబాబును ప్రశ్నించారు. ప్రత్యేక తెలంగాణ రాష్ట్రానికి చంద్రబాబు, చిరంజీవి మద్దతు పలికి, కేంద్రం సానుకూలత వ్యక్తం చేయగానే, ప్లేటు ఫిరాయించి బాబు ఆధ్వర్యంలోనే ఆంధ్రావారంతా ఒక్కటయ్యారని విమర్శించారు. సీపీఎం పేదల పార్టీ అని చిలకపలుకులు పలుకుతోందని, ఇక్కడివారి బాధలు వారికి పట్టడంలేదని ఆయన విమర్శించారు. బాబు ముఖ్యమంత్రిగా ఉన్నప్పుడు ఎస్సీలకు వచ్చిన రూ.9వేల కోట్ల నిధులు ఇతర పథకాలకు మళ్లించారని ఆరోపించారు. తెలంగాణలో ఎస్టీలు 12శాతం ఉన్నారని, ప్రత్యేక రాష్ట్రం ఏర్పడితే అన్ని రంగాల్లో ఆమేరకు రిజర్వేషన్లు అమలవుతాయన్నారు. కొత్త రాష్ట్రం ఏర్పడితే సీఎం దళితుడేనని, ఉప ముఖ్యమంత్రి ముస్లిం అవుతారన్నారు. డిసెంబరు 31 తర్వాత తెలంగాణ రాష్ట్రం రాకపోతే ఉద్యమాలు ఉప్పెనలా లేస్తాయని, భూకంపం సృష్టించైనా సాధించుకుంటామన్నారు.