తెలంగాణపై చంద్రబాబుకు శాస్తి తప్పదు: తెరాస నేత హరీష్ రావు

సిద్దిపేట: తమ ఉనికిని చాటుకోవడానికే తెలుగు దేశం పార్టీ అధినేత చంద్రబాబునాయుడు మెదక్ జిల్లా పర్యటన చేస్తున్నాడని సిద్దిపేట ఎమ్మెల్యే హరీష్ రావు ధ్వజమెత్తారు. తెలంగాణపై చంద్రబాబు తన వైఖరి తెలియజేయాలని అడిగిన తెలంగాణ వాదులు, విద్యార్థులను పోలీసులు అరెస్టు చేయటమేమిటని ప్రశ్నించారు. చంద్రబాబు మూల్యం చెల్లించుకోక తప్పదని ఆయన హెచ్చరించారు. ప్రతిపక్ష నాయకుడు పర్యటనకు వస్తే తెరాస కార్యకర్తలను అరెస్టు చేయడమేమిటని ఆయన అడిగారు. ఎన్నికల సమయంలో జై తెలంగాణ అన్న చంద్రబాబు ఆ తర్వాత మాట మార్చారని ఆయన విమర్శించారు.

తెలంగాణపై తన వైఖరి స్పష్టం చేయకుండా పర్యటించిన చంద్రబాబే ఈ ఘటనకు బాధ్యత వహించాలన్నారు. ఎన్నికలకు ముందు జై తెలంగాణ అన్న చంద్రబాబునాయుడు ఇప్పుడు అనకపోవడమేమిటని ప్రశ్నించారు. చంద్రబాబు అడ్డుకోకుంటే ఎన్డీఎ ప్రభుత్వం హయాంలోనే తెలంగాణ వచ్చేదనే విషయం అందరికీ తెలుసునని ఆయన అన్నారు. తెలుగు దేశం పార్టీ కార్యకర్తలు రౌడీల్లా ప్రవర్తించి తెలంగాణవాదులపై దాడి చేశారన్నారు.