పిసిసి అధ్యక్ష పదవిపై కన్నేసిన మాజీ మంత్రి షబ్బీర్ అలీ

న్యూఢిల్లీ‌: మాజీ మంత్రి షబ్బీర్ అలీ ప్రదేశ్ కాంగ్రెసు కమిటీ (పిసిసి) అధ్యక్ష పదవి కన్నేశారు. పదవీ కాలం ముగిసిన తర్వాత కూడా డి. శ్రీనివాసే ఆ పదవిలో కొనసాగుతున్నారు. కొద్దిరోజులుగా ఢిల్లీలో మకాం వేసి ఆయన పీసీసీ పదవికోసం ప్రయత్నాలు సాగిస్తున్నారు. కేంద్రమంత్రి గులాంనబీ అజాద్‌ ద్వారా ఆయన పైరవీ చేస్తున్నారు. ముఖ్యమంత్రిగా రాయలసీమ నేత, ఉప ముఖ్యమంత్రి, పీసీసీ అధ్యక్ష పదవుల్లో తెలంగాణా నేతలుంటే కోస్తా ప్రాంతానికి దక్కేదేమిటంటూ ఈ ప్రతిపాదనపై కోస్తాకు చెందిన ముఖ్యనేతలు అధిష్ఠానం వద్ద అభ్యంతరం వ్యక్తం చేశారు.

ఒకవేళ ఆ రెండు పదవులు తెలంగాణ ప్రాంతానికే ఇవ్వాల్సి వస్తే రెండో ఉప ముఖ్యమంత్రి పదవిని సృష్టించి దాన్ని కోస్తా ప్రాంతానికి ఇవ్వాలని వారు పట్టుబడుతున్నట్లు తెలిసింది. రెండు ఉప ముఖ్యమంత్రి పదవులకు ముఖ్యమంత్రి కిరణ్‌ సుముఖంగా లేనట్లు చెబుతున్నారు. ఈ గొడవ వల్లే ఈ పదవుల పంపకం నిలిచిపోయినట్లు పార్టీ వర్గాల్లో చర్చ సాగుతోంది. పిసిసి అధ్యక్షుడు డి. శ్రీనివాస్ గురువారం ఢిల్లీ వచ్చారు. ఆయన మూడు రోజుల పాటు ఇక్కడే ఉంటారని తెలుస్తోంది. పిసిసి అధ్యక్ష పదవితో పాటు శాసనసభ స్పీకర్, ఉప ముఖ్యమంత్రి పదవులను తేల్చడానికి ఆయన అధిష్టానానికి చెందిన నేతలతో చర్చిస్తున్నట్లు తెలుస్తోంది.