చంద్రబాబు తలకు టిడిపి మాల, మాదిగ విభేదాల బొప్పి

హైదరాబాద్: మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ వర్గీకరణ ఉద్యమం తెలుగుదేశం పార్టీ అధ్యక్షుడు నారా చంద్రబాబునాయుడికి తలబొప్పి కట్టించే ప్రమాదం ఉంది. తెలుగుదేశం పార్టీలో మాల, మాదిగల మధ్య చిచ్చు రగిలింది. తెలుగుదేశం పార్టీ కార్యాలయం ఎన్టీఆర్ ట్రస్టు భవన్ లో పార్టీలోని ఇరు వర్గాల మధ్య వివాదం చెలరేగింది. మందకృష్ణ మాదిగకు మద్దతు తెలిపిన తెలుగుదేశం నాయకులను పార్టీలోని మాల నాయకులు నిలదీశారు. తమను కాదని ఎస్సీ రిజర్వేషన్ల వర్గీకరణకు ఎలా మద్దతిస్తారని మాల నాయకులు వారిని ప్రశ్నించారు.

వర్గీకరణకు అనుకూలంగా పార్టీ నిర్ణయం తీసుకుందని, అది పార్టీ విధానమని చెబుతూ పార్టీ విధాన నిర్ణయాన్ని ఎలా ప్రశ్నిస్తారని మాదిగ నాయకులు మాల నాయకులను ప్రశ్నించారు. మందకృష్ణ మాదిగకు మద్దతుగా తెలుగుదేశం నాయకులు నాగం జనార్దన్ రెడ్డి, దేవేందర్ గౌడ్, కడియం శ్రీహరి, మోత్కుపల్లి నర్సింహులు సోమవారం ఉదయం ముఖ్యమంత్రి నివాసం వరకు పాదయాత్ర చేయాలని నిర్ణయించారు. అయితే వారిని పోలీసులు అడ్డగించి అరెస్టు చేశారు. పోలీసు స్టేషన్ లో వారు కొద్దిసేపు ధర్నా చేశారు. ఆ ధర్నాను నాగం జనార్దన్ రెడ్డి విరమింపజేశారు.

కాగా, చంద్రబాబు ప్రస్తుతం సింగపూర్ పర్యటనలో ఉన్నారు. ఆయన సోమవారం రాత్రి గానీ మంగళవారం గానీ హైదరాబాద్ రావచ్చు. అప్పుడు మాల, మాదిగల పంచాయతీ చంద్రబాబు వద్దకు చేరే అవకాశం ఉంది. తెలంగాణ మీది వైఖరి మాదిరిగానే వర్గీకరణ వివాదం కూడా చంద్రబాబుకు తలనొప్పిగా మారే ప్రమాదం ఉంది.