భాను కిరణ్ మధురలో అరెస్టయ్యాడా, లొంగిపోవడానికి సిద్ధపడ్డాడా?

హైదరాబాద్: మద్దెలచెర్వు సూరి హత్య కేసులో నిందితుడు భాను కిరణ్ అరెస్టుపై విభిన్న కథనాలు వినిపిస్తున్నాయి. అతను మధురలో అరెస్టయినట్లు, పోలీసులకు లొంగిపోవడానికి సంకేతాలు పంపినట్లు వార్తలు వస్తున్నాయి. అయితే, ఆ వార్తాకథనాలను పోలీసులు ఖండిస్తున్నారు. భాను అరెస్టుపై వస్తున్న వార్తలను వారు వదంతులుగా కొట్టిపారేస్తున్నారు. భాను కిరణ్ గన్‌మన్ మన్మోహన్, అనుచరుడు సుబ్బయ్యలను పోలీసులు అదుపులోకి తీసుకుని విచారించారు. భాను కిరణ్‌తో సంబంధాలున్నట్లు ఆరోపణలు ఎదుర్కుంటున్న శ్రీకాంత్ గౌడ్‌కు వచ్చిన ఫోన్ కాల్స్ అధారంగా సుబ్బయ్యను, మన్మోహన్‌లను పోలీసులు అదుపులోకి తీసుకున్నట్లు సమాచారం. శ్రీకాంత్ గౌడ్‌కు మన్మోహన్ భార్య ఫోన్ చేసినట్లు సమాచారం.

కాగా, సుబ్బయ్య, మన్మోహన్‌లను వెంట పెట్టుకుని భాను కోసం పోలీసులు గాలిస్తున్నట్లు వార్తలు వస్తున్నాయి. ఢిల్లీ, మధుర ప్రాంతాల్లో నాలుగు పోలీసు బృందాలు గాలిస్తున్నట్లు తెలుస్తోంది. తనకు పరిచయం ఉన్న పోలీసుల ద్వారా లొంగిపోవడానికి సిద్ధంగా ఉన్నట్లు భాను సంకేతాలు పంపుతున్నట్లు కూడా వార్తలు వస్తున్నాయి. తన కుటుంబ సభ్యులపై ఒత్తిడి పెరుగుతుండడంతో భాను లొంగిపోవడానికి సిద్ధపడినట్లు చెబుతున్నారు.

భాను కిరణ్ వద్ద సూరి హత్య తర్వాత 50 లక్షల రూపాయలు ఉన్నట్లు వార్తలు వస్తున్నాయి. ఆ డబ్బులతో అతను పోలీసుల నుంచి తప్పించుకుని తిరుగుతున్నట్లు చెబుతున్నారు. చాలా సేపు ఒక చోట ఉండకుండా వాహనాలు అద్దెకు తీసుకుని ఒక ప్రాంతం నుంచి మరో ప్రాంతానికి ప్రయాణం చేస్తూ పోలీసుల నుంచి తప్పించుకుంటున్నట్లు తెలుస్తోంది.