చర్లపల్లి జైలులో ఘర్షణ: ఐఎస్ఐ తీవ్రవాది సహా ముగ్గురికి గాయాలు

హైదరాబాద్: హైదరాబాదులోని చర్లపల్లి జైలులో ఐఎస్ఐ తీవ్రవాదులకు, జైలు సిబ్బందికి మధ్య తీవ్ర ఘర్షణ చోటు చేసుకుంది. మంగళవారం ఉదయం జరిగిన ఈ ఘర్షణలో ఐఎస్ఐ తీవ్రవాది ఖలీల్ ఖాజాతో పాటు ఇద్దరు అధికారులు గాయపడ్డారు. వారిని ప్రాణహిత ఆస్పత్రిలో చేర్చారు. సోమవారం సాయంత్రం కూడా ఘర్షణ చోటు చేసుకుంది. ఈ ఘర్షణలో జైలు సూపరింటిండెంట్ గాయపడ్డారు. ఆయనను హైదరాబాదులోని నిజాం వైద్య విజ్ఞాన సంస్థ (నిమ్స్)లో చేర్చారు. బ్యారక్‌ల్లో సిబ్బంది తనిఖీలు ప్రారంభించడంతో ఈ ఘర్ణణ చోటు చేసుకుంది.

జైలులో సులేమాన్ అలీ బాయ్, వికారుద్దీన్‌ల వద్ద సెల్ ఫోన్లు ఉన్నాయనే ఆరోపణలు రావడంతో జైలు సిబ్బంది తనిఖీలు చేపట్టారు. ఈ సమయంలో ఐఎస్ఐ తీవ్రవాదులు జైలు సిబ్బందిపై దాడికి దిగారు. ఈ సందర్భంగా తీవ్ర ఉద్రిక్తత చోటు చేసుకుంది. పాపాగ్ని బ్యారక్‌లో జైలు సిబ్బందికి మూడు సెల్ ఫోన్లు, రెండు బుల్లెట్లు లభించాయి. పోలీసుల జోక్యంతో పరిస్థితి సద్దుమణిగిందని సైబరాబాద్ పోలీసు కమిషనర్ ద్వారకా తిరుమల రావు చెప్పారు.