సోనియా గాంధీతో వైయస్ వివేకానంద రహస్య భేటీ, తెలంగాణ భయంతోనే

న్యూఢిల్లీ: కొద్ది రోజులుగా ఢిల్లీలో మకాం వేసిన రాష్ట్ర వ్యవసాయ శాఖ మంత్రి వైయస్ వివేకానంద రెడ్డి, ఆయన అల్లుడు నర్రెడ్డి రాజశేఖర రెడ్డి రహస్యంగా కాంగ్రెసు అధ్యక్షురాలు సోనియా గాంధీతో సమావేశమైనట్లు తెలుస్తోంది. కడప పార్లమెంటు సీటుకు, పులివెందుల శాసనసభా నియోజకవర్గానికి జరిగే ఉప ఎన్నికలపై, అభ్యర్థుల ఖరారుపై వారు సోనియాతో మాట్లాడినట్లు సమాచారం. పులివెందుల శాసనసభా నియోజకవర్గం నుంచి తాను పోటీ చేయనున్నట్లు వైయస్ వివేకానంద రెడ్డి ఇప్పటికే చెప్పారు. కాగా, కడప పార్లమెంటు సీటులో తన సోదరుడు దివంగత వైయస్ రాజశేఖర రెడ్డి కుమారుడు, మాజీ పార్లమెంటు సభ్యుడు వైయస్ జగన్‌పై తన అల్లుడు నర్రెడ్డి రాజశేఖర రెడ్డిని పోటీకి దించేందుకు వైయస్ వివేకానంద రెడ్డి ప్రయత్నిస్తున్నారు.

కడప పార్లమెంటు సీటుకు కాంగ్రెసు పార్టీ అభ్యర్థిగా తన అల్లుడు నర్రెడ్డి రాజశేఖర రెడ్డిని నిలబెట్టేందుకు సోనియా గాంధీ నిర్ణయం సంపాదించడానికి వైయస్ వివేకానంద రెడ్డి ప్రయత్నాలు చేస్తున్నారు. నర్రెడ్డి రాజశేఖర రెడ్డి అభ్యర్థిత్వాన్ని ఖరారు చేయించేందుకు, ఉప ఎన్నికల వ్యూహాన్ని ఖరారు చేసేందుకు ఆయన సోనియాతో చర్చలు జరిపినట్లు తెలుస్తోంది. తాను కడప నుంచి పోటీ చేస్తానని నర్రెడ్డి రాజశేఖర రెడ్డి ఇప్పటికే ప్రకటించారు.

తెలంగాణపై ప్రకటన చేయాలని పట్టుబట్టేందుకు కొద్ది రోజులుగా కాంగ్రెసు తెలంగాణ ప్రాంత శాసనసభ్యులు, ఎమ్మెల్సీలు ఢిల్లీలో మకాం వేశారు. వారు కాంగ్రెసు కోర్ కమిటీకి చెందిన నాయకులతో సమావేశమవుతున్నారు. అయినా, తెలంగాణకు అనుకూలంగా వారికి ఏ విధమైన స్పందనలు లభించడం లేదు. సోనియాను కలిసేందుకు వారు ప్రయత్నాలు సాగిస్తున్నారు. అయితే వారికి సోనియా అపాయింట్‌మెంట్ లభించడం లేదు. వారిని కలుసుకోకుండా వైయస్ వివేకానంద రెడ్డితో సమావేశమైతే విమర్శలు వస్తాయని భయపడి ఆమె రహస్యంగా వివేకానంద రెడ్డితో సమావేశమైనట్లు చెబుతున్నారు. సోనియాతో సమావేశమైన తర్వాతనే వివేకానంద రెడ్డి హైదరాబాదుకు తిరిగి వచ్చినట్లు సమాచారం.

English summary

It is learn that Sonia Gandhi held secret meeting with Minister YS Vivekananda Reddy, who reached Delhi along with his son - in - law Narredy Rajasekhar Reddy. As the Congress MLAs from Telangana are eagerly awaiting meet with her to avoid embarassment she met YS Viveka secretly.