చిన్న నిర్మాతల పోరు: దాసరి నారాయణ రావు వర్సెస్ అల్లు అరవింద్?

హైదరాబాద్‌: తెలుగు సినీ నిర్మాతల మధ్య చెలరేగుతున్న వివాదం అల్లు అరవింద్ వర్సెస్ దాసరి నారాయణ రావుగా మారనుందా అనే అనుమానాలు తలెత్తుతున్నాయి. తెలుగు సినీ రంగంలో పెద్ద నిర్మాతలకు, చిన్న నిర్మాతలకు మధ్య టికెట్ల రేట్ల పెంపుపై విభేదాలు భగ్గుమంటున్నాయి. సినిమా టికెట్ రేట్లు పెంచాలని ఐదుగురు పెద్ద నిర్మాతలు ముఖ్యమంత్రి కిరణ్ కుమార్ రెడ్డిని కోరారని, తాము టికెట్ల రేట్ల పెంపును వ్యతిరేకిస్తున్నామని చిన్న నిర్మాతలు అంటున్నారు. అల్లు అరవింద్, అశ్వినీదత్, సురేష్ బాబు, దిల్ రాజు తమ స్వప్రయోజనాలు మాత్రమే చూసుకుంటున్నారని నట్టి కుమార్ సహా మరో ఇద్దరు చిన్న నిర్మాతలు ఆరోపించారు. వారు సోమవారం టీవీ చానెళ్లలో ఈ విషయంపై మాట్లాడారు.

స్వలాభం కోసం మాత్రమే పని చేస్తూ సినీ రంగాన్ని సర్వనాశనం చేయడానికి పూనుకున్న ఐదుగురు పెద్ద నిర్మాతలను ఎదుర్కోవడానికి దాసరి నారాయణ రావు ముందుకు రావాలని నట్టి కుమార్ అన్నారు. అలా రావడం దాసరి నారాయణ రావు బాధ్యత అని ఆయన అన్నారు. తెలుగు సినీ రంగాన్ని కాపాడడానికి దాసరి ముందుకు వస్తారని అనుకుంటున్నట్లు ఆయన తెలిపారు. ప్రజారాజ్యం పార్టీ అధ్యక్షుడు చిరంజీవిపై కూడా ఆయన పరోక్ష వ్యాఖ్యలు చేశారు. తన కుమారుడి సినిమా, మేనల్లుడి సినిమా విడుదలకు సిద్ధంగా ఉన్నాయి కాబట్టి టికెట్ రేట్లు పెంచాలని కోరుతున్నారని, ఒకటి రెండు వారాల్లో పెట్టిన డబ్బులకు మించి ప్రజల నుంచి దండుకోవడానికి టికెట్ రేట్లు పెంచాలని అడుగుతున్నారని ఆయన అన్నారు.

ఖలేజా, ఆరెంజ్ వంటి సినిమాలకు భారీ పెట్టుబడులు ఎవరు పెట్టమన్నారని ఆయన అడిగారు. ఓ నిర్మాత ఓ హీరోయిన్‌కు రెండు కోట్ల 25 లక్షల రూపాయలు ఇవ్వడానికి సిద్ధపడ్డారని, హీరోకు పది కోట్ల నుంచి 18 కోట్ల రూపాయల వరకు ఇస్తున్నారని, ఆ రకంగా నిర్మాణ వ్యయం పెంచుకుంటున్నారని, ఒక్కో సినిమాను రెండేళ్ల పాటు తీస్తూ కూడా బడ్జెట్ పెంచుకుంటున్నారని, దీన్నంతా ప్రజల నుంచి రాబట్టడానికి ప్రయత్నిస్తున్నారని ఆయన అన్నారు. నిత్యావసర సరుకుల ధరలు పెంచితే తగ్గించాలని ఆందోళన చేస్తున్న వ్యక్తి సినిమా టికెట్ల రేట్లు పెంచాలని అడుగుతున్నాడని నట్టి కుమార్ చిరంజీవిపై పరోక్ష విమర్శ చేశారు.

English summary

It seems that the tussle between small producers and big producers may turn into struggle between Dasari Narayana Rao and Allu aravind. Producer Natti Kumar appeals to Dasari Narayana Rao to come forwward to fight against big producers.