ఆజాద్‌తో సమావేశానికి సీమాంధ్ర ఎంపి కావూరి సాంబశివరావు డుమ్మా

న్యూఢిల్లీ: సీమాంధ్ర పార్లమెంటు సభ్యులతో కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ శుక్రవారం నిర్వహించిన సమావేశానికి పార్లమెంటు సభ్యుడు కావూరి సాంబశివ రావు డుమ్మా కొట్టారు. పార్టీ తెలంగాణ ప్రాంత పార్లమెంటు సభ్యులతో సమావేశం తర్వాత శుక్రవారం ఆజాద్ సీమాంధ్ర ఎంపిలతో సమావేశమయ్యారు. కాగా, కావూరి సాంబశివ రావు హైదరాబాదులో ఉన్నారు. ఆయన శుక్రవారం ముఖ్యమంత్రి కిరణ్ కుమార్ రెడ్డిని కలిశారు.

ఆజాద్ సమావేశానికి కావూరి రాకపోవడంలో ప్రత్యేకత ఏమీ లేదని కాంగ్రెసు సీమాంధ్ర పార్లమెంటు సభ్యుడు మాగుంట శ్రీనివాసులు రెడ్డి చెప్పారు. కావూరి తమకు ఫోన్ చేశారని, తనకు హైదరాబాదులో పని ఉండడం వల్ల రాలేకపోతున్నానని చెప్పారని ఆయన మీడియా ప్రతినిధులతో చెప్పారు. అదే విషయాన్ని కావూరి సాంబశివ రావు హైదరాబాదులో చెప్పారు. ఆజాద్ ఏర్పాటు చేసిన సమావేశానికి హాజరు కాకపోవడం వెనక ప్రత్యేక కారణం ఏదీ లేదని ఆయన చెప్పారు. వ్యక్తిగత పనుల వల్లనే వెళ్లలేకపోయానని ఆయన హైదరాబాదులో చెప్పారు.