ఆజాద్‌కు తెలంగాణ కాంగ్రెసు ఎంపిల అల్టిమేటం, రాజీనామాలకు రెడీ

న్యూఢిల్లీ: తెలంగాణ రాజకీయాలతో ఢిల్లీ మరోసారి వేడెక్కింది. తెలంగాణ రాష్ట్ర ఏర్పాటుపై కాంగ్రెసు తెలంగాణ ప్రాంత పార్లమెంటు సభ్యులు పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌కు అల్టిమేటం ఇచ్చారు. తెలంగాణ రాష్ట్ర ఏర్పాటుపై స్పష్టమైన ప్రకటన కోసం మే 15వ తేదీ వరకు వేచి చూస్తామని, ఆ తర్వాత పరిస్థితి తమ చేతుల్లో ఉండదని తెలంగాణ కాంగ్రెసు పార్లమెంటు సభ్యులు ఆయన చెప్పారు. కాంగ్రెసు తెలంగాణ ప్రాంత పార్లమెంటు సభ్యులతో గులాం నబీ ఆజాద్ శుక్రవారం సమావేశమయ్యారు. జూన్ తొలి వారం లోపు తెలంగాణ రాష్ట్రాన్ని ప్రకటించాలని వారు డిమాండ్ చేశారు. తమ డిమాండ్‌ను నెరవేర్చకపోతే తాము తమ తమ నియోజకవర్గాల్లో తిరిగే పరిస్థితి ఉందని వారు ఆజాద్‌కు చెప్పారు.

తెలంగాణపై ప్రకటన చేయకపోతే తాము రాజీనామాలు చేస్తామని, రాజకీయాల నుంచి తప్పుకుంటామని తెలంగాణ ఎంపీలు హెచ్చరించారు. శ్రీకృష్ణ కమిటీ ఎనిమిదో అధ్యాయం అంశాలపై తెలంగాణ ఎంపీలు విరుచుకుపడ్డారు. అందులో రెచ్చగొట్టే విషయాలున్నాయని వారన్నారు. గులాం నబీ ఆజాద్‌తో సమావేశం తర్వాత పొన్నం ప్రభాకర్, మధు యాష్కీ గౌడ్, సర్వే సత్యనారాయణ మీడియా ప్రతినిధులతో మాట్లాడారు. తెలంగాణ ఇస్తే తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు క్రెడిట్ పోతుందని, రెండు ప్రాంతాల్లోనూ కాంగ్రెసు ఓడిపోతుందనే వాదనను సర్వే సత్యనారాయణ ఖండించారు.

తెలంగాణ ఇస్తే తెరాస విలీనానికి తాము కూడా ప్రయత్నాలు చేస్తామని, కెసిఆర్‌ను ఒప్పించడానికి కృషి చేస్తామని తాము ఆజాద్‌తో చెప్పినట్లు ఆయన తెలిపారు. తెలంగాణ ఇస్తే ఈ ప్రాంతంలో కనీసం కాంగ్రెసుకు 15 సీట్లు వస్తాయని ఆయన విశ్వాసం వ్యక్తం చేశారు. తెలంగాణ ఇస్తే సీమాంధ్రలో పార్టీకి ఏ విధమైన నష్టం జరగదని ఆయన అన్నారు.