బుచ్చయ్యను విందుకు పిలిచిన మురళీమోహన్, గొడవపై ద్విసభ్య కమిటీ

హైదరాబాద్: రాజమండ్రి వ్యవహారంపై పార్టీని వీడడానికి సిద్ధపడిన సీనియర్ నేత గోరంట్ల బుచ్చయ్య చౌదరిని తెలుగుదేశం పార్టీ నాయకుడు, సినీ నటుడు మురళీమోహన్ విందుకు ఆహ్వానించారు. అందుకు బుచ్చయ్య చౌదరి తిరస్కరించారు. దీన్ని బట్టి బుచ్చయ్య చౌదరి తన అలకను మానలేదని అర్థమవుతోంది. బుచ్చయ్య చౌదరికి నచ్చజెప్పేందుకే మురళీ మోహన్ విందుకు ఆహ్వానించినట్లు చెబుతున్నారు. బుచ్చయ్య చౌదరి వర్గానికి, రాజమండ్రి మేయర్ వర్గానికి మధ్య నెలకొన్న విభేదాలను పరిష్కరించడానికి పార్టీ నాయకత్వం నడుం బిగించింది.

సమస్యను పరిష్కరించి, ఇరు వర్గాల మధ్య సామరస్యాన్ని కుదర్చడానికి తెలుగదేశం పార్టీ అధిష్టానం ద్విసభ్య కమిటీని వేసింది. ఈ కమిటీలో గరికపాటి రామ్మోహన్ రావు, కాగితం వెంకట్రావు ఉన్నారు. వీరిద్దరు ఇరు వర్గాలతో చర్చలు జరిపారు. ఈ చర్చల సారాంశంతో చంద్రబాబుకు వారు ఓ నివేదికను సమర్పిస్తారు. ఇరు వర్గాల నాయకులు పార్టీ అధ్యక్షుడు నారా చంద్రబాబు నాయుడిని కలిసే అవకాశం ఉంది.

English summary

TDP senior leader Buchaiah Chowdary rejected actor and party leader Murali Mohan's invitation.