రోజుకో స్టేషన్ తిప్పుతున్నారంటూ గాలి ఆవేదన

హైదరాబాద్: తమను రోజుకో పోలీసు స్టేషన్ తిప్పుతున్నారంటూ సిబిఐ కస్టడీలో ఉన్న కర్ణాటక మాజీ మంత్రి గాలి జనార్దన్ రెడ్డి ఆవేదన వ్యక్తం చేస్తున్నారు. సిబిఐ దెబ్బకు గాలి జనార్దన్ రెడ్డి, ఆయన బంధవు శ్రీనివాస రెడ్డి అల్లాడిపోతున్నారు. పట్టుపరుపులపై పరుండే వారు లాకప్‌లో కటికనేలపై పడుకోలేక నరకయాతన అనుభవిస్తున్నారట. తమను రోజుకో పోలీస్‌స్టేషన్‌కు తిప్పుతున్నారని గాలి జనార్దన్ రెడ్డి ఆవేదన వ్యక్తం చేశారు.. ఆ లాకప్‌లలో మనుషులెవరూ ఉండలేరని, అసలక్కడ ప్రశాంతంగా ఉండదగ్గ వాతావరణమే లేదని లబోదిబోమన్నారు.

నిర్ధారిత వేళల్లోనే తమను ప్రశ్నించాలని కోర్టు ఆదేశాలు ఇవ్వకపోవడాన్ని సీబీఐ అధికారులు అవకాశంగా మలచుకొంటున్నారని ఆరోపించారు. నిర్ణీత సమయంలోనే ఇంటరాగేషన్ జరిగేలా చూడాలని కోరుతూ గురువారం గాలి జనార్దన్ రెడ్డి సీబీఐ ప్రత్యేక న్యాయస్థానంలో విడివిడిగా పిటిషన్లు దాఖలు చేశారు. విచారణ సమయంలో తమ న్యాయవాదులు ఉండడానికి కోర్టు అనుమతించినాస వారికి తాము కనబడడమే కానీ, తమ మాటలు వారికి వినబడట్లేదన్నారు. తమను సీబీఐ అధికారులు అడిగే ప్రశ్నలు తమ న్యాయవాదులకు కూడా వినిపించేలా, నిర్ధారిత వేళలు పాటించేలా ఆదేశాలు జారీచేయాలని వారు తమ పిటిషన్లలో కోరారు.

English summary

Gali Janardhan Reddy has complained that CBI is shifting him from one PS to other PS.