ఇప్పుడే తెరవద్దు: అనంత పద్మనాభుని ఆరో గదిపై సుప్రీం

By Srinivas

Published: Thursday, September 22, 2011, 11:54 [IST]

న్యూఢిల్లీ: కేరళ రాష్ట్రంలోని తిరువనంతపురం అనంతపద్మనాభ స్వామి ఆలయ ఆరో నేలమాళిగ చిక్కు ఇంకా వీడలేదు. ఆలయానికి గట్టి భద్రత ఏర్పాటు చేశాక ఆరో నేలమాళిగను తెరవాలా వద్దా అనే నిర్ణయం కోర్టు తీసుకుంటుందని గురువారం సుప్రీం కోర్టు చెప్పింది. పూర్తి భద్రత కల్పించాకే నిర్ణయం వెలువడుతుందని చెప్పారు. ఆలయానికి కేరళ ప్రభుత్వం కల్పిస్తున్న భద్రత పట్ల సుప్రీం కోర్టు సంతృప్తి వ్యక్తం చేసింది. అయితే మరింత భద్రత కల్పించాలని రాష్ట్ర ప్రభుత్వానికి ఆదేశాలు జారీ చేసింది.

ఆలయ రక్షణ చర్యలకు నిర్వాహకులు రూ.25 లక్షలు కేటాయించాలని కోర్టు ఆదేశించింది. కోర్టు నుండి మళ్లీ ఉత్తర్వులు వచ్చే వరకు ఆరో నేలమాళిగను తెరవద్దని ఆదేశాలు జారీ చేసింది. అలాగే ఇప్పటి వరకు వెలికి తీసిన సంపాదను చిత్రీకరించి భద్రపర్చాలని ఆదేశాలు జారీ చేశారు. పద్మనాభ స్వామి ఆలయం విషయంలో ఆనంద్ ఘోష్ కమిటీ చేసిన సిఫార్సులను సుప్రీం కోర్టు ఆమోదించింది.

Published On September 22, 2011