తెలంగాణలో సమ్మె మరి మీకేమైంది?: వైయస్ జగన్ ప్రశ్న

By Srinivas

Published: Thursday, October 13, 2011, 19:13 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి రెండో రోజైన గురువారం పార్టీ సభ్యత్వ నమోదుపై దృష్టి సారించారు. శ్రీకాకుళం, విజయనగరం, విశాఖపట్నం, తూర్పు గోదావరి, పశ్చిమ గోదావరి జిల్లా నేతలతో జగన్ భేటీ అయ్యారు. పార్టీ సభ్యత్వ నమోదుపై ఆయన తీవ్రంగా అసంతృప్తి వ్యక్తం చేసినట్లుగా తెలుస్తోంది. తెలంగాణ ప్రాంతంలో సకల జనుల సమ్మె కారణంగా పార్టీ సభ్యత్వాలు తక్కువగా ఉన్నాయని మరి మీ మీ జిల్లాల్లో ఏమైందని ప్రశ్నించినట్లుగా తెలుస్తోంది. పార్టీ సభ్యత్వాలపై దృష్టి సారించాలని సూచించారు. పార్టీ నిర్మాణం కోసం బాగా కృషి చేయాలని చెప్పారు.

కాగా బుధవారం సైతం జగన్ మెదక్, రంగారెడ్డి, మహబూబ్ నగర్ జిల్లా నేతలతో సమావేశమైన విషయం తెలిసిందే. పార్టీ స్థాపించిన చాలా రోజుల తర్వాత జగన్ పార్టీ నిర్మాణ కార్యక్రమాలపై దృష్టి సారించారు. ఆయా జిల్లా కోఆర్డినేటర్లు, ఇంచార్జులతో సమావేశమై పార్టీని పటిష్ట పరచాలని సూచిస్తున్నారు. అలాగే స్థానికంగా ప్రజలు ఎదుర్కొనే సమస్యలపై కూడా ఉద్యమించాలని వారికి చెప్పారు. ఆయా జిల్లా నేతలతో ఈ నెల 15 వరకు జగన్ సమావేశాలో కొనసాగుతాయి.

Published On October 13, 2011