వెనక్కి తగ్గండి: తెలంగాణ ఎంపీలకు బొత్స ఫోన్

By Srinivas

Published: Friday, October 14, 2011, 14:53 [IST]

హైదరాబాద్: తెలంగాణ అంశంపై ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ మరోసారి స్పందించారు. తెలంగాణ సమస్యను కాంగ్రెసు పార్టీ అధిష్టానం త్వరలో పరిష్కరిస్తుందని ఆయన ఆశాభావం వ్యక్తం చేశారు. సకల జనుల సమ్మె వల్ల తెలంగాణలో ప్రజలు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు. ఉద్యోగులు వెంటనే సమ్మెను విరమించాలని విజ్ఞప్తి చేశారు. సకల జనుల సమ్మెలో భాగంగా జరుగుతున్న రైలు రోకోలో తెలంగాణ ప్రాంత పార్లమెంటు సభ్యులు పాల్గొనవద్దని ఆయన విజ్ఞప్తిచే చేశారు. అదే విషయంపై ఆయన ఎంపీలకు ఫోన్ కూడా చేసినట్లు తెలుస్తోంది. ప్రభుత్వం చర్యల కారణంగా తెలంగాణలో బస్సులు తిరుగుతున్నాయన్నారు. రెండు రోజుల్లోగా తొంబై శాతం బస్సులు అందుబాటులోకి వస్తాయన్నారు.

ఆర్టీసి ఉద్యోగులతో చర్చలకు సిద్ధంగా ఉన్నట్లు చెప్పారు. తెలుగుదేశం పార్టీ అధినేత నారా చంద్రబాబు నాయుడుకు ప్రజా సమస్యల కంటే రాజకీయ ప్రయోజనాలే ముఖ్యమన్నారు. తెలంగాణ ప్రాంతంలోని పదమూడు మంది శాసనసభ్యులు అమ్ముడు పోయారని తెలంగాణ రాష్ట్ర సమితి ఎమ్మెల్యే కల్వకుంట్ల తారక రామారావు వ్యాఖ్యలను బొత్స కొట్టిపారేశారు. ఆధారాలు ఉంటే బయట పెట్టాలని డిమాండ్ చేశారు. తెలంగాణపై తన వ్యక్తిగత అభిప్రాయాల కంటే అధిష్టానం నిర్ణయానికే కట్టుబడి ఉంటానన్నారు.

Published On October 14, 2011