కెసిఆర్‌తో మేము, ఎమ్మెల్యేలూ ఆమరణ దీక్ష: హరీష్

మెదక్: ప్రత్యేక రాష్ట్ర సాధన కోసం అవసరమైతే తెలంగాణ రాష్ట్ర సమితి శాసనసభ్యులు కూడా ఆమరణ నిరాహార దీక్షకు సిద్ధంగా ఉన్నారని సిద్దిపేట శాసనసభ్యుడు హరీష్ రావు ఆదివారం మెదక్ జిల్లాలో ప్రకటించారు. పార్టీ అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావుతో సహా తాము కూడా దీక్షకు సిద్ధమన్నారు. సీమాంధ్ర ముఖ్యమంత్రి కిరణ్ కుమార్ రెడ్డి తెలంగాణలో జరుగుతున్న సకల జనుల సమ్మెను అణిచి వేయడానికి కుట్ర పన్నుతున్నారని విమర్శించారు.

కాగా ప్రజల ఇబ్బందుల దృష్ట్యా సకల జనుల సమ్మె విరమించాలన్న కేంద్రమంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ వ్యాఖ్యలపై తెలంగాణ ఉద్యోగ సంఘ నేతలు స్వామి గౌడ్, దేవి ప్రసాద్ తదితరులు స్పందించారు. ప్రజల ఇబ్బందుల దృష్ట్యా కేంద్రం వెంటనే తెలంగాణపై స్పష్టమైన ప్రకటన చేయాలని వారు విజ్ఞప్తి చేశారు. ఆజాద్ వ్యాఖ్యలు స్వాగతిస్తున్నామని కానీ తెలంగాణపై స్పష్టమైన ప్రకటన వచ్చే దాకా సమ్మె విరమించేది లేదన్నారు. సకల జనుల సమ్మె ద్వారా కేంద్రానికి తెలంగాణ ఆకాంక్ష తెలియజేశామన్నారు. తెలంగాణపై నిర్ధిష్ట సమయం ప్రకటించాలన్నారు. అయితే ఆజాద్ విజ్ఞప్తిపై సమావేశంలో చర్చించి నిర్ణయిస్తామన్నారు.

English summary

TRS MLA Harirh Rao said today that mlas also ready to take fast with chief K Chandrasekhar Rao for Telangana.