'జగన్', ఓయు విద్యార్థులకు వేరు న్యాయమా?: రేవంత్

By Srinivas

Published: Wednesday, December 28, 2011, 17:00 [IST]

హైదరాబాద్: సిబిఐ కార్యాలయంపై దాడి చేసిన వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి అనుచరులపై ఇప్పటి వరకు కేసు పెట్టని పోలీసులు, ఉస్మానియా విశ్వవిద్యాలయంలో న్యాయం కోసం ఉద్యమిస్తున్న విద్యార్థులు క్యాంపస్ దాటకుండానే కేసులు పెడుతున్నారని తెలుగుదేశం పార్టీ ఎమ్మెల్యే రేవంత్ రెడ్డి బుధవారం విమర్శించారు. జగన్ అనుచరులపై ఇప్పటి వరకు కేసు ఎందుకు పెట్టలేదని ఆయన ప్రశ్నించారు. రాష్ట్రంలో ప్రజలకే కాదు మంత్రులకు, జైల్లో ఉన్న ఖైదీలకు కూడా రక్షణ లేకుండా పోయిందన్నారు. రాష్ట్రంలో ప్రస్తుతం డమ్మీ హోంమంత్రి ఉన్నారన్నారు.

గవర్నర్ నరసింహన్ శాంతిభద్రతలపై కేంద్రానికి తప్పుడు నివేదికలు పంపిస్తున్నారని ధ్వజమెత్తారు. సాక్ష్యాత్తూ మంత్రిపై దాడి జరిగితే ఖండించి ఊరుకున్నారన్నారు. రాష్ట్రంలో వరుస హత్యలు జరుగుతున్నా ప్రభుత్వం ఎందుకు చర్యలు తీసుకోవడం లేదన్నారు. పలు హత్యలకు నయీమ్ ముఠానే కారణమని తెలిసినప్పటికీ ప్రభుత్వం చర్యలెందుకు తీసుకోవడం లేదని ప్రశ్నించారు. ఆయన ముఠాకు ప్రభుత్వం ఏమైనా లైసెన్స్ ఇచ్చిందా అన్నారు.

Published On December 28, 2011