ఇటాలియన్ను విడుదల చేసిన మావోయిస్టులు
ఇటాలియన్ విడుదల చేయడానికి మరో మావోయిస్టు ఆర్తి మంజీని తమకు అప్పగించాలని మావోయిస్టులు డిమాండ్ పెట్టినట్లు ఎన్డీటివీ న్యూస్ చానెల్ అంతకు ముందు ఓ వార్తాకథనం ద్వారా తెలిపింది. ఆర్తి మంజీ బెయిల్ పిటిషన్ గురువారం సాయంత్రం కోర్టులో విచారణకు వచ్చే అవకాశం ఉంది. మార్చి 14వ తేదీ నుంచి తమ చెరలో ఉన్న ఇటాలియన్ను బుధవారం రాత్రి మావోయిస్టులు వదిలేసినట్లు ముందు వార్తలు వచ్చాయి.
ఇటాలియన్ను మోహోననా గ్రామంలో వదిలేశారని ఓ ప్రముఖ వార్తా సంస్థ తెలిపింది. అయితే, ఆయన విడుదలపై అధికారిక సమాచారమేదీ అప్పుడు లభించలేదు. ఒడిషా ప్రభుత్వం తీసుకున్న చర్యలను ఆహ్వానిస్తూ ఇటాలియన్ను వదిలేస్తామని గురువారం మావోయిస్టు నేత సవ్యసాచి పాండా చెప్పారు. ఇటాలియన్ బందీని విడుదల చేసినట్లు మావోయిస్టులు ధ్రువీకరించారంటూ తెలుగు టీవీ చానెళ్లలో వార్తలు వస్తున్నాయి.
కాగా, మావోయిస్టు మరో గ్రూప్ చేతిలో బందీగా ఉన్న శాసనసభ్యుడు జినా హికాకా ఇంకా చెర వీడలేదు. హికాకాను మార్చి 24వ తేదీన మావోయిస్టులు కిడ్నాప్ చేశారు. తమ డిమాండ్లను పరిష్కరిస్తే తప్ప హికాకాను వదిలేది లేదని వారంటున్నారు. హికాకా విడుదలకు 23 మందిని విడిచి పెట్టేందుకు ఒడిషా ప్రభుత్వం అంగీకరించింది. వీరిలో 8 మంది మావోయిస్టులు ఉన్నారు.