పాక్ ఎన్నికల రేసు నుంచి ముషార్రఫ్ అవుట్
తాజాగా ఎన్ఎ -32 చిత్రాల్ నియోజకవర్గానికి దాఖలు చేసిన ముషార్రఫ్ నామినేషన్ పత్రాలు మంగళవారం తిరస్కరణకు గురయ్యారు. మిగతా మూడు నియోజకవర్గాల్లో పోటీకి దాఖలు చేసిన పత్రాలు ఇది వరకే తిరస్కరణకు గురయ్యాయి. పాకిస్తాన్ రాజధానిలో, పంజాబ్ ప్రొవిన్స్లో పోటీ చేయడానికి ముషార్రఫ్కు అవకాశం లేకుండా చేస్తూ ట్రిబ్యునల్ మంగళవారం ఉదయం ఆదేశాలు జారీ చేసింది.
ఇస్లామాబాద్, కసూర్ నియోజకవర్గాలకు ముషార్రఫ్ దాఖలు చేసిన నామినేషన్ పత్రాలను రిటర్నింగ్ అధికారులు తిరస్కరిస్తూ తీసుకున్న నిర్ణయాలను హైకోర్టు న్యాయమూర్తులతో కూడిన ట్రిబ్యునల్ సమర్థించింది. కరాచీ పార్లమెంటరీ నియోజకవర్గానికి దాఖలు చేసిన నామినేషన్ పత్రాలను తరిస్కరించడాన్ని సమర్థిస్తూ మరో ట్రిబ్యునల్ ఇది వరకే తీర్పు వెలువరించింది.
2007లో అత్యవసర పరిస్థితిని విధించడం ద్వారా రాజ్యాంగాన్ని ఉల్లంఘించారనే కారణంతో రిటర్నింగ్ అధికారులు ముషార్రఫ్ నామినేషన్ పత్రాలను తిరస్కరించారు. నాలుగు పార్లమెంటరీ నియోజకవర్గాల నుంచి పోటీ చేయడానికి ముషార్రఫ్ ప్రయత్నించారు. అయితే, ఆయనకు ఎదురు దెబ్బ తగిలింది. మే 11వ తేదీన పాకిస్తాన్ ఎన్నికలు జరగనున్నాయి.