సందీప్ ఎడమచేతిపై పచ్చబొట్టు: అలా చేస్తే.. ఇంత ఘోరం జరగకపోయేది?
సందీప్ తన ఎడమ చేతిపై 'ఎం' అనే అక్షరం పచ్చబొట్టు పొడిపించుకున్నట్లు తెలుస్తోంది
వేటపాలెం: ప్రేమ పెళ్లిళ్లకు సవాలక్ష సవాళ్లు. కులం, మతం, ఆస్తి, అంతస్తు.. వగైరా. వీటన్నింటిని దాటుకుని పెళ్లి దాకా వెళ్లినా.. ఆపై అంతా సజావుగా సాగుతుందనుకోవడానికి లేదు. సైరాత్ లాంటి సినిమాలను తలపించే కథలు మన చుట్టూ ఉన్న సమాజంలో బోలేడు.
ఇదీ జరిగింది: చీరాల ప్రేమజంట విషాదం వెనుక.. ఆ విషయం ఎవరికీ తెలియదు!
ఎంత వెల్ సెటిల్డ్ అయినా సరే.. ప్రేమ పెళ్లికి 'నో' అనేవాళ్లే ఎక్కువ. అలాంటిది.. చదువు కూడా పూర్తి కాకుండానే ప్రేమ పెళ్లంటే ఇంకా కష్టం. ఈ ఆలోచనలే చీరాల ప్రేమ జంట సందీప్-మౌనికలను ఉక్కిరిబిక్కిరి చేసుంటాయి. ఒకరిని విడిచి ఒకరు ఉండలేని స్థితిలో పెళ్లయితే చేసుకోగలిగారు కానీ ఇంట్లో వాళ్లకు నచ్చజెప్పే ధైర్యం చేయలేకపోయారు.
క్షణికావేశమే:
వేటపాలెం రైల్వే స్టేషన్ సమీపంలో వీరిద్దరు ఆత్మహత్య చేసుకోవడంతో.. అటు వారి తల్లిదండ్రులతో పాటు ఇటు స్నేహితులు సైతం తీవ్రంగా ఆవేదన చెందుతున్నారు. క్షణికావేశమే వారిని బలితీసుకుందని వాపోతున్నారు.
సందీప్ చేతిపై పచ్చబొట్టు:
కాగా, సందీప్ తన ఎడమ చేతిపై 'ఎం' అనే అక్షరం పచ్చబొట్టు పొడిపించుకున్నట్లు తెలుస్తోంది. మౌనికపై ఉన్న ప్రేమకు గుర్తుగా అతను పచ్చబొట్టు పొడిపించుకుని ఉంటాడని పోలీసులు చెబుతున్నారు. వారి ప్రేమ, పెళ్లి విషయమేది స్నేహితులకు తెలియకపోవడం గమనార్హం.
ఎవరికీ చెప్పలేదు:
పెళ్లి చేసుకోవడానికి విజయవాడ వెళ్లిన సందర్భంలోను వారు ఎవరికీ సమాచారం అందించలేదు. పెళ్లయితే చేసుకోగలిగారు కానీ ఇంట్లోవాళ్లకు చెప్పడానికి ధైర్యం సరిపోలేదు. రెండు కుటుంబాల మధ్య తీవ్ర ఘర్షణలు చోటు చేసుకుంటాయని ఆందోళన చెందారు. వీటన్నింటి కన్నా బలవన్మరణం చేసుకోవడమే కరెక్ట్ అనుకున్నారు.
అలా చేస్తే.. పరిస్థితి వేరుగా ఉండేదేమో:
మౌనిక కూడా ఇందుకు అంగీకరించడంతో.. ఇద్దరూ కలిసి వేటపాలెం వైపు బయలుదేరారు. అక్కడికి వెళ్లేముందు తాము ఆత్మహత్య చేసుకోబోతున్నామని సందీప్ తన స్నేహితుడికి వాట్సాప్ ద్వారా మెసేజ్ చేశాడు. అనంతరం ఫోన్ స్విచాఫ్ చేసుకున్నాడు. ఆపై రైలు పట్టాలపై ఇద్దరూ విగత జీవులుగా కనిపించారు.
క్షణికావేశంలో తీసుకున్న నిర్ణయం వల్లే వారి ప్రాణాలు పోయాయని కుటుంబ సభ్యులు వాపోతున్నారు. స్నేహితుడికి మెసేజ్ చేసిన తర్వాత కొద్ది నిముషాలు వారు వేచి చూసినా పరిస్థితి మరోలా ఉండేదేమో అంటున్నారు.