గ్రీన్ ఫీల్డ్ కేసు: శంకర రావుపై పలు సెక్షన్ల కింద కేసులు!
హైదరాబాద్: గ్రీన్ ఫీల్డ్ భూఆక్రమణల పైన విచారణ చేయాలని మల్కాజిగిరి కోర్టు నేరేడ్మెట్ పోలీసులను సోమవారం ఆదేశించింది. గ్రీన్ ఫీల్డ్ కేసు పైన వెంటనే దర్యాఫ్తు నిర్వహించాలని ఆదేశాలు జారీ చేసింది. అదే విధంగా మాజీ మంత్రి శంకర రావు, అతని సోదరుడు పైన కేసు నమోదు చేయాలని ఆదేశించింది.
మాజీ మంత్రి శంకర రావును కేసులు వీడడం లేదు. కోర్టు ఆదేశాల నేపథ్యంలో నేరేడ్మెట్ పోలీసులు శంకర రావు, ఆయన సోదరుడి పైన పది సెక్షన్ల కింద కేసులు నమోదు చేసినట్లుగా తెలుస్తోంది.
సూర్యరాంరెడ్డి అపహరణ
గుత్తేదారు సూర్య రాంరెడ్డి అపహరణకు గురైనట్లు ఆయన సతీమణి కూకట్పల్లి హౌసింగ్ బోర్డు పోలీసు స్టేషన్లో ఫిర్యాదు చేశారు. ఓ ప్రయివేటు కంపెనీలో పని చేసే వ్యక్తులే తన భర్తను కిడ్నాప్ చేశారని ఆమె ఫిర్యాదులో పేర్కొన్నారు.
నెల్లూరు జిల్లాలో బోరుబావిలో పడిన బాలిక
శ్రీ పొట్టి శ్రీరాములు నెల్లూరు జిల్లాలో నాలుగేళ్ల బాలిక బోరుబావిలో పడిన విషయం వెలుగులోకి వచ్చింది. డక్కిలి మండలంలోని కుప్పాయపాలెం గ్రామ సమీపంలో బాలిక బోరుబావిలో పడినట్లు గుర్తించారు. ఆదివారం సాయంత్రం నుంచి బాలిక కనిపించకుండా పోవడంతో తల్లిదండ్రులు పోలీసులకు ఫిర్యాదు చేశారు. అనంతరం చిన్నారి కోసం వెతుకుతుండగా బాలిక ప్రమాదవశాత్తు బోరుబావిలో పడినట్లు గుర్తించారు. బాలికను బయటకు తీయడానికి పోలీసులు, రెవెన్యూ అధికారులు ప్రయత్నాలు ప్రారంభించారు.