మహేష్ బాబు, చంద్రబాబు ట్వీట్ల సంభాషణ వెనక ఎవరు?
హైదరాబాద్: మహేష్ బాబు శ్రీమంతుడు సినిమాపై రాజకీయ నాయకులు కూడా ప్రశంసల జల్లు కురిపిస్తున్నారు. సామాజిక బాధ్యత నెరవేర్చాలని చెప్పే ప్రయోజనాత్మక సినిమా కావడంతో రాజకీయ నాయకులకు ఈ సినిమా బాగా నచ్చిందని అంటున్నారు. అయితే, శ్రీమంతుడు సినిమాపై ప్రశంసలు కురిపిస్తూ ఆంధ్రప్రదేశ్ ముఖ్యమంత్రి నారా చంద్రబాబు నాయుడు ట్వీట్ చేశారు.
దానికి మహేష్ బాబు కూడా చంద్రబాబుకు థ్యాంక్స్ చెబుతూ ట్వీట్ చేశాడు. ఈ ట్వీట్ల సంభాషణ వెనక వ్యవహారం ఏమిటనే ఆసక్తి రాజకీయ వర్గాల్లో నెలకొంది. రాజకీయాలకు దూరంగా ఉండే మహేష్ బాబు ఆ కాస్తా ప్రతిస్పందించడం వెనక గుంటూరు తెలుగుదేశం పార్టీ పార్లమెంటు సభ్యుడు గల్లా జయదేవ్ ఉన్నారనే మాట వినిపిస్తోంది.
గల్లా జయదేవ్ మహేష్ బాబుకు బావ అనే విషయం అందరికీ తెలిసిందే. గల్లా జయదేవ్ చొరవతోనే ఇరువురి మధ్య ట్వీట్ల సంభాషణ సాగినట్లు చెబుతున్నారు. ట్వీట్ చేసేంత తీరిక చంద్రబాబుకు లేదు. రాజకీయాలకు దూరంగా ఉండే మనస్తత్వం మహేష్ బాబుది. పైగా, మహేష్ బాబు తండ్రి కృష్ణ దివంగత నేత వైయస్ రాజశేఖర రెడ్డికి సన్నిహితంగా ఉండేవారు. కాంగ్రెసుకు అనుకూలంగా కూడా ఉంటూ వచ్చారు. ఈ స్థితిలో చంద్రబాబుకు మహేష్ బాబును దగ్గర చేయడానికి గల్ల జయదేవ్ ఓ చేయి వేశారా అనే అనుమానాలు కలుగుతున్నాయి.
మహేష్ బాబు ఇటీవల తెంలగాణలోని మహబూబ్నగర్ జిల్లాలో ఓ గ్రామాన్ని దత్తత తీసుకున్నారు. ఆంధ్రప్రదేశ్ రాష్ట్రంలో బుర్రిపాలెం గ్రామాన్ని దత్తత తీసుకున్నారు. అయితే, ఆంధ్రప్రదేశ్ రాష్ట్రానికి మరింత మేలు జరిగేలా మహేష్ బాబును దగ్గర చేసుకోవడానికి చంద్రబాబు ప్రయత్నాలు చేస్తున్నట్లు చెబుతున్నారు.