జగన్ చెప్తే, హోదా కోసం రాజీనామాకు సిద్ధం: పెద్దిరెడ్డి
ప్రత్యేక హోదా కోసం తమ పార్టీ అధినేత ఆదేశిస్తే తాను రాజీనామా చేస్తానని, తమ పార్టీ ఎమ్మెల్యేలు కూడా రాజీనామాకు సిద్ధమని వైసిపి నేత, పుంగనూరు ఎమ్మెల్యే పెద్దిరెడ్డి రామచంద్రా రెడ్డి చెప్పారు.
చిత్తూరు: ప్రత్యేక హోదా కోసం తమ పార్టీ అధినేత ఆదేశిస్తే తాను రాజీనామా చేస్తానని, తమ పార్టీ ఎమ్మెల్యేలు కూడా రాజీనామాకు సిద్ధమని వైసిపి నేత, పుంగనూరు ఎమ్మెల్యే పెద్దిరెడ్డి రామచంద్రా రెడ్డి చెప్పారు.
ప్రత్యేక హోదా ఆంధ్రుల హక్కు అన్నారు. తమకు రాజకీయ ప్రయోజనాలు కాదని, రాష్ట్ర అభివృద్ధి ముఖ్యమని చెప్పారు. దేశంలో ఏ ముఖ్యమంత్రి చేయని విధంగా సీఎం చంద్రబాబు విదేశీ పర్యటనలు చేశారన్నారు.
దాని వల్ల ఏం లాభం వచ్చిందో చెప్పాలన్నారు. ప్రత్యేక హోదా వచ్చి ఉంటే రాష్ట్రానికి ఎంతో లబ్ధి చేకూరి ఉండేదన్నారు. ప్యాకేజీ వల్ల ఏ ప్రయోజనం ఉండదన్నారు. శాంతియుతంగా చేపట్టిన కొవ్వొత్తుల ర్యాలీ పట్ల ప్రభుత్వం అణిచివేత ధోరణితో వ్యవహరిస్తోందన్నారు.
కేసుల భయం వల్లే చంద్రబాబు హైదరాబాదును వీడి అమరావతికి మకాం మార్చారన్నారు. రాష్ట్ర ప్రయోజనాలను చంద్రబాబు కేంద్రానికి తాకట్టు పెట్టారన్నారు. హోదా ఉద్యమాన్ని మరింత ఉధృతం చేసి, ప్రజల్లోకి తీసుకు వెళ్తామన్నారు.