ఆడబిడ్డగా రేణుకా చౌదరి నిరూపించుకోవాలి: రాంరెడ్డి

ఖమ్మం: కాంగ్రెసు పార్టీ రాజ్యసభ సభ్యురాలు రేణుకా చౌదరి ఖమ్మం జిల్లా ఆడబిడ్డ ఎలా అవుతుందో నిరూపించుకోవాలని, ఆమె తెలంగాణ ఆడబిడ్డగా సర్టిఫికేట్ తెచ్చుకోవాలని మంత్రి రాంరెడ్డి వెంకట రెడ్డి మంగళవారం ఎద్దేవా చేశారు. ఆయన ఖమ్మంలో విలేకరులతో మాట్లాడారు.

ఆడబిడ్డల మనోభావాలను దెబ్బతీసే హక్కు ఎవరికీ లేదన్నారు. ఈ నెల 21న ఖమ్మంలో జరిగే సమావేశానికి రేణుకను ఆహ్వానించే విషయంలో తెలంగాణ ప్రాంత మంత్రుల కమిటీ నిర్ణయిస్తుందని చెప్పారు. ఆడబిడ్డ అనే పదానికి ఎంతో గౌరవముందని, రేణుకా చౌదరి ఖమ్మం ఆడబిడ్డ అయితే నిరూపించుకోవాలన్నారు.

సమైక్యాంధ్రనే: భూమన

తమ పార్టీ ఎప్పుడు రాష్ట్రాన్ని విభజించాలని చెప్పలేదని వైయస్సార్ కాంగ్రెసు పార్టీ ఎమ్మెల్యే భూమన కరుణాకర్ రెడ్డి తిరుపతిలో అన్నారు. తాము అప్పుడు, ఇప్పుడు సమైక్యాంధ్రనే అంటున్నామన్నారు. విభజన విషయంలో ఓ తండ్రిలా సమస్యకు పరిష్కారం చూపించాలని మాత్రమే కోరామన్నారు.

విద్యుత్ ఐకాసతో కిరణ్ చర్చలు

విద్యుత్ ఉద్యోగుల ఐక్యకార్యాచరణ సమితితో ముఖ్యమంత్రి కిరణ్ కుమార్ రెడ్డి క్యాంపు కార్యాలయంలో మంగళవారం సుదీర్ఘంగా చర్చలు జరిపారు. చర్చలు ఓ కొలిక్కి రాకపోవడంతో తిరిగి రాత్రి ఏడు గంటలకు చర్చించాలని నిర్ణయించుకున్నారు.

English summary

Minister Ramreddy Venkat Reddy on Tuesday questioned How Renuka Chouwdary is Khammam district's Adabidda.