లొంగిపోయిన టీవీ9 రవిప్రకాశ్‌కి బెయిల్, ఇలా(పిక్చర్స్)

By Srinivas

| Updated: Sunday, August 17, 2014, 14:35 [IST]

హైదరాబాద్: ప్రముఖ న్యూస్ చానల్ టీవీ9 సీఈవో రవి ప్రకాశ్ ఎల్బీ నగర్ పోలీస్ స్టేషన్‌లో శనివారం లొంగిపోయారు. అనంతరం బెయిల్ పైన ఆయనను విడుదల చేశారు. తెలంగాణ ప్రజాప్రతినిధులను, శాసనసభను అవమానించారని రవి ప్రకాశ్ పైన కేసు నమోదైన విషయం తెలిసిందే.

దీనిపై న్యాయస్థధానం నాన్ బెయిలబుల్ వారెంట్ జారీ చేసింది. దీంతో శనివారం అతను ఎల్బీ నగర్ పోలీస్ స్టేషన్‌కు వచ్చారు. టీవీ9 చానల్లో జూలైలో ప్రసారమైన ఓ కథనం పైన న్యాయవాది సుంకరి జనార్ధన్ గౌడ్ సహా మరో ఇద్దరు న్యాయవాదులు రంగారెడ్డి జిల్లా కోర్టులో పిటిషన్ దాఖలు చేశారు.

కోర్టు ఆదేశాల మేరకు ఎల్బీ నగర్ పోలీసులు కేసు నమోదు చేశారు. దీంతో ఆయన తనను అరెస్టు చేయకుండా హైకోర్టును ఆశ్రయించారు. కింది కోర్టులో హాజరు కావాలని లేదా ఎల్బీ నగర్ పోలీసు స్టేషన్లోనైనా లొంగిపోవాలని హైకోర్టు సూచించింది.

షరతులతో కూడిన బెయిల్ పొందవచ్చునని తెలిపింది. శనివారం సాయంత్రం నాలుగున్నర గంటలకు రవి ప్రకాశ్ ఎల్బీ నగర్ పోలీస్ స్టేషన్లో లొంగిపోయారు. రూ.25వేల పూచీకత్తతో, మరో ఇద్దరు వ్యక్తుల రూ.25వేల చొప్పున రుసుమును పూచీకత్తుగా ఇచ్చారు.