అమెరికాను వణికించిన ఉల్కాపాతం! (వీడియో)
వాషింగ్టన్: అమెరికాలో ఉల్కాపాతం ఆ దేశస్తులను వణికించింది. ఓ ఉల్క తమ వైపు దూసుకొచ్చి పేలిపోవడంతో వారు భయాందోళనలకు గురయ్యారు. మంగళవారం అమెరికాలోని పశ్చిమతీరం, కెనడాల్లో ఈ ఉల్కపాతం కనిపించింది.
ఒహియో, మిచిగాన్, ఆంటారియోల్లో మంగళవారం రాత్రి 8 గంటల ప్రాంతంలో ఈ ఘటన జరిగింది. ఆకాశంలో నుంచి ప్రకాశవంతంగా మెరుస్తూ దూసుకొస్తున్న గ్రహశకలాన్ని పలువురు తమ కెమెరాల్లో బంధించారు.
కొంతమంది ఈ ఉల్కాపాతానికి సంబంధించిన ఫొటోలు, వీడియోలను సోషల్ మీడియాలో పోస్ట్ చేశారు. ఈ ఉల్క పేలుడుకు తూర్పు మిచిగాన్లోని సెయింట్ క్లెయిర్ తీరంలో 2.0 తీవ్రతతో భూమి కంపించింది.
అది ఉల్కపాతమేనని అమెరికా జియోలాజికల్ సర్వే స్పష్టం చేసింది. మొదట్లో అది మెరుపో లేక పిడుగో అనుకున్నా.. చివరికి అది ఉల్కపాతమేనని తేలినట్లు డెట్రాయిట్లోని నేషనల్ వెదర్ సర్వీస్ (ఎన్డబ్ల్యూఎస్) వెల్లడించింది.
అయితే ఊహిచని విధంగా ఉల్కాపాతం సంభవించడం, అత్యంత ప్రకాశవంతంగా ఉండడంతో ఆ ప్రాంతంలోని ప్రజలు ఒక్కసారిగా ఉలిక్కిపడ్డారు. దీనిని గమనించిన పలువురు భూమిపైకి ఏలియన్స్ వచ్చారా? లేక భూమి అంతం అవుతోందా? అంటూ ట్వీట్లు చేశారు.