భలే ఛాన్స్: పెళ్లిలో సెల్ఫోన్లు, నోట్ల వర్షం (వీడియో)
సాధారణంగా పెళ్లికి వచ్చిన అతిథులపై పూలు, పన్నీరు చల్లుతారు. కానీ పెళ్లికి వచ్చిన వారిపై ఏకంగా సెల్ఫోన్లు, కరెన్సీ నోట్ల వర్షం కురిస్తే? సరిగ్గా ఇదే జరిగిందక్కడ.
ఇస్లామాబాద్: సాధారణంగా పెళ్లికి వచ్చిన అతిథులపై పూలు, పన్నీరు చల్లుతారు. ఇక వేడుకల్లో కళాకారులపై డబ్బులు వెదజల్లడం గుజరాత్ వంటి రాష్ట్రాల్లో మామూలే. కానీ పెళ్లికి వచ్చిన వారిపై ఏకంగా సెల్ఫోన్లు, కరెన్సీ నోట్ల వర్షం కురిస్తే?
సరిగ్గా ఇదే జరిగిందక్కడ. దీంతో పెళ్లికొచ్చిన వారంతా అవాక్కయ్యారు. ఆనక సెల్ఫోన్లు, కరెన్సీ నోట్ల కోసం ఎగబడిపోయారు. ఇంతకీ ఈ పెళ్లి జరిగిందెక్కడో తెలుసా? పాకిస్తాన్లో.
అవును, పాకిస్తాన్ ముల్తాన్లోని షుజాబాద్కు చెందిన మొహమ్మద్ అర్షద్కు, పంజాబ్ ప్రావిన్స్లోని ఖన్పూర్కు చెందిన ఓ అమ్మాయితో పెళ్లి జరిగింది. వరుడు అర్షద్కు ఎనిమిది మంది అన్నయ్యలు ఉన్నారు.
వారిలో కొందరు అమెరికాలో, ఇంకొందరు సౌదీ అరేబియాలో స్థిరపడి బాగా సంపాదించారు. అందరిలోకి చిన్నవాడు, ఆఖరివాడు అర్షద్. దీంతో తమ్ముడి పెళ్లి కలకాలం అందరికీ గుర్తుండిపోవాలని అతడి అన్నలు అనుకున్నారు.
అంతే.. అతడి పెళ్లికి వచ్చిన వారందరిపై సెల్ఫోన్లు, డాలర్లు, రియాల్ నోట్ల వర్షం కురిపించారు. తమ పర భేదం లేకుండా పెళ్లికొచ్చిన ప్రతి ఒక్కరికీ సెల్ఫోన్గానీ, కరెన్సీ నోట్లుగానీ సొంతమయ్యాయి. పెళ్లి వేడుకలో చోటుచేసుకున్న ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్గా మారింది.