వీడియోకాన్ లోన్ కేసు: చందా కొచ్చర్కు సెబీ నోటీసులు
న్యూఢిల్లీ: ఐసీఐసీఐ బ్యాంకు సీఈఓ చందాకొచ్చర్కు మార్కెట్ రెగ్యులేటరీ సెక్యురిటీస్ అండ్ ఎక్స్చేంజ్ బోర్డు ఆఫ్ ఇండియా(సెబీ) నోటీసులు జారీచేసింది. రూ. 3,250 కోట్ల వీడియోకాన్ రుణ కేసులో సంబంధాలు ఉన్నట్టు ఆరోపణలపై సెబీ ఈ నోటీసులు పంపంది. ఈ విషయాన్ని బ్యాంకు శుక్రవారం తెలిపింది.
గురువారమే ఐసీఐసీఐ బ్యాంకు ఈ నోటీసులు అందుకుందని, వీడియోకాన్ గ్రూప్ అండ్ న్యూపర్ రెన్యువబుల్స్ మధ్య డీలింగ్స్ విషయంలో ఆరోపణలు వెల్లువెత్తుడటంతో పాటు, ఈ రుణ కేసులో సంబంధం ఉన్నట్టు వస్తున్న ఆరోపణలపై స్పందించాలని ఆమెను సెబీ కోరింది.
చందాకొచ్చర్ భర్త దీపక్ కొచ్చర్కు లబ్ది చేకూరేలా క్విడ్ ప్రో కో ప్రాతిపదికన వీడియోకాన్ గ్రూప్కు ఐసీఐసీఐ బ్యాంకు రుణం జారీచేసిట్టు ఆరోపణలున్నాయి. ఈ కేసు విషయంలో సరియైన వివరణను స్టాక్ మార్కెట్లకు బ్యాంకు ఇవ్వలేదని మార్కెట్ రెగ్యులేటరీ భావిస్తోంది.
ఎస్సీఆర్ రూల్స్ 2005, రూల్ 4(1) కింద సెబీ ఈ నోటీసును జారీచేసినట్టు ఐసీఐసీఐ బ్యాంకు తెలిపింది. సెబీకి తాము సరియైన వివరణ ఇస్తామని ఐసీఐసీఐ బ్యాంకు రెగ్యులేటరీ ఫైలింగ్లో వెల్లడించింది.
వీడియోకాన్ సంస్థ 2012లో రూ.3,250 కోట్లను ఐసీఐసీఐ బ్యాంకు నుంచి రుణంగా పొందింది. ఆ సంస్థ ఆధినేత వేణుగోపాల్ ధూత్.. దీపక్ కొచ్చర్ సంస్థ న్యూపవర్లో పెట్టిన రూ.64 కోట్లు పెట్టుబడికి, బ్యాంకు రుణానికి సంబంధం ఉందని ఆరోపణలు వచ్చాయి. దీనిపై సీబీఐ విచారణ జరుపుతోంది.